胡杏兒一舊飯彈出
1999年仍在科大讀書的胡杏兒「無心插柳」參選港姐，結果自嘲好豬同成舊飯的她憑甜美面孔贏得季軍，不過獎項其實得來不易。杏兒參選正值考試，為配合港姐外景檔期，竟敢向科大老師要求個人提早考試，而老師又肯冒試題有可能外洩之險，讓杏兒先考，結果憑着不放棄精神既贏出比賽又可通過考試。
我選港姐嗰年有郭羨妮、黃泆潼、梁敏儀、原子鏸等好多靚女，當年啲花名都好犀利，有「翻版關詠荷」、「翻版蔡少芬」，而我就覺得自己好豬，得19歲咋！郭羨妮嗰年就由頭帶到尾，原子鏸都好Fit，我覺得佢哋已穩佔頭、二名，第三名就未發現，其實我冇諗過自己得，自己又冇咩突出，我估贏到都係因為決賽時我條問題表現得好好，司儀要我做喜、怒、哀、樂表情，就係咁突出咗！
同屆靚女多不勝數
其實，選港姐都唔係自己意願，因為我從來都冇諗過有咁嘅能力，但大學Roommate係我最好嘅同學，佢叫我陪佢去選，連表格都攞埋，我嗰時都有做吓Part time model，所以咪一齊去買泳衣，又Send啲相去……點知好快就有回音，嗰日我上上吓堂收到電話，港姐嗰邊叫我去面試。嘩……我去到大開眼界，個個都好靚女，個個都有備而來，而我就好豬咁，覺得自己似舊飯！去到面試，答吓問題咁啦，我仲記得我寄去面試幅相好細路女，冇乜化妝，個樣好純；不過，又畀我入到圍，至於同我一齊報名嘅Roommate都有入五十名，而我就係咁無心插柳參選。
老師冒險偷步考試
本來我選唔到，因為港姐要去外國拍外景，咁啱又撞咗我考試個期，冇理由放棄考試而去鬥靚，因為我冇十足把握贏，嗰時我剛讀大學一年級，點都要有一年成績先，之後如果要停學先再算，所以，我點都要考試，以為冇乜可能（港姐），但我性格又係啲肯去嘗試嘅人，即管問咗先，便問老師畀我考先，點知個個都支持，好奇怪呀！其實我都覺得有啲荒謬，但人生就係咁安排，老師肯冒試題可能畀其他同學知嘅險而畀我提早考喎，真係難得！後來我選完都有返去多謝班老師，至於成績當然唔會好好，但都可以升學，總算幫自己爭取到想做嘅嘢！
口述：胡杏兒
筆錄：影視組