靚佬湯遊印 軍警揸槍開路
荷里活型佬湯告魯斯前日首次踏足印度宣傳新片《職業特工隊：鬼影約章》，被過百粉絲圍觀，所到之處均有荷槍軍警睇實。靚佬湯透露遊印度是畢生心願，並大讚泰姬陵宏偉。
靚佬湯前日以經典作《壯志凌雲》太陽眼鏡Look現身印度宣傳新片《職業特工隊：鬼影約章》並於當地舉行試映會，老婆姬蒂賀姆絲及女兒蘇莉未有隨行。他抵埗後即到泰姬陵觀光，引來大批粉絲圍觀。靚佬湯所到之處均有荷槍軍警睇實以防出現混亂，可見他備受重視。靚佬湯受訪時表示：「我一直都好想來印度遊覽，今次可算係圓夢！我好興奮！」難怪他當日「四萬咁口」，又不停在泰姬陵前擺甫士影相拎回家給囡囡睇。
拍檔做導遊
而在片中演出的《一百萬零一夜》印度巨星Anil Kapoor亦有到場，擔任靚佬湯的導遊。Anil透露靚佬湯不停讚嘆泰姬陵十分宏偉。二人老友鬼鬼，不時搭膊頭及握手合照，「謀殺」了記者不少菲林。Anil於當日晚上在孟買為靚佬湯舉辦了私人派對，邀請了150位當地紅星如Aamir Khan現身。昨日舉行試映會後，靚佬湯便到杜拜，並於周三舉行全球首映禮。
文：外娛組