林嘉欣心思思生龍B
林嘉欣昨日出席活動時談起囡囡Kayla即一臉幸福，指囡囡帶給她前所未有的滿足。她透露囡囡現已13個月大，已開始學會與人分享，還坦言心思思想生多一個；而為了跟家人團聚，她已決定返港定居，並強調與箍實老公的傳聞無關。
從加拿大回流返港的林嘉欣，昨日以嘉賓身份出席於又一城舉行的「救助兒童會《織善冷帽》慈善義賣日2011」活動，身為媽咪的她一臉幸福地大談湊女經：「囡囡好鍾意執樹葉同石頭，所以屋企都儲埋好多石頭。佢最近又學識咗同人分享，以前佢有啲咩我叫佢畀媽媽，佢都唔肯，依家叫佢畀媽媽佢就會畀我。有次我哋去海灘玩，佢見到個年紀比佢大嘅姐姐，都識得主動埋去抱抱。」
嘉欣透露囡囡Kayla現已十三個月大，她很享受湊囡囡的時光：「佢每朝六點幾就會叫醒我，一聽到佢『媽媽、媽媽』咁就會即刻同自己講『唔瞓喇，陪囡囡先』，嗰種滿足感係從未試過嘅。（生多個？）我都心思思，有啲朋友話兩個小朋友年紀唔好太近，有啲又話唔好差太遠。（生龍B？）冇刻意諗，都想。」
返港定居與家人團聚
嘉欣表示已正式返回香港定居：「因為想同家人團聚，兩邊走就爸爸辛苦囉！（會唔會再拍戲？）其實都有傾過劇本，但都係要返大陸，囡囡太細個，所以唔考慮。（有傳你回流係想箍實老公？）我覺得最後好自然都會返香港定居，始終十三個鐘嘅機程距離太遠，同箍唔箍無關，我哋嘅關係都係好好。」文：名人組