古天樂年賺一億等生仔
向來是玩具迷及愛打機的古天樂，最近以七位數字酬金出任Xbox 360 Kinect無手掣體感遊戲代言人及成為香港區遊樂總監，夥拍兩個小朋友拍攝平面及電視廣告。早前古仔和兩個小朋友在客廳場景大玩《迪士尼大冒險》體感遊戲，由於無手掣關係，為配合遊戲古仔擺出不同有趣動作，而且不用半小時即和小朋友們打成一片。其中小女孩當正古仔是男友一樣又攬又錫，流露一臉父愛的古仔即時軟化，常抱着小女孩談天逗玩，非常溫馨！
畀仔啜起雞皮
雖然古仔猶如湊仔公般享受「冧女樂」，但小男孩卻頻頻出招「爭寵」，並施展獨門啜功，專攻古仔的耳仔，大力啜住不放，搞到古仔大笑大叫：「嘩！啜到咁實，雞皮起哂！連耳屎都畀你啜埋出嚟！」愛讀兒童及成人心理書籍的古仔，直言思想傳統一定生仔︰「做爸爸一定要陪小朋友成長，所以想遲啲冇咁忙先諗生仔問題，我諗我會好易縱小朋友，所以要上堂學習吓兒童心理。」
十五廣告在手
古仔自言未有計劃賺夠幾多先開始生兒育女，不過今年古仔接拍至少六部戲以及超過十五個廣告，據知其今年收入高達一億港元！古仔對此只說：「所有收入都係得阿媽知，我連瞓覺時間都冇，邊得閒問！」
另外，昨日古仔出席Xbox記招時和小朋友即場打機，古仔說：「細路好鍾意同我玩，同佢哋打機唔好成日贏佢哋，否則唔好玩！」文：專案組