祖兒出手拉攏Sa霆行埋

為慶祝英皇歌迷會成立十周年，昨日假港島高爾夫球場舉辦「紙鳶有愛」慈善活動，善款將捐贈「歡樂滿東華」，英皇旗下藝人歌手幾乎晒冷力撐，包括祖兒、基仔、Twins、BOYZ、鍾舒漫、William等，加上近二百歌迷舉牌支持，場面非常墟冚。

林欣彤懶理緋聞

阿Sa日前才聲言未有準備生BB，但若果上天賜予「驚喜」也會生下來。未知William是否怕尷尬被追問，與女友刻意分開離行離列，二人在台上並肩而站時，他更踎低避鏡頭，最終要祖兒做夾心人才肯合照！相反緋聞情侶林欣彤（Mag）跟陳家樂大方並排而坐，更頻頻咬耳仔密斟。問Mag會否跟家樂一齊放紙鳶？她說：「同成棚人一齊放。（會唔會怕緋聞避開佢？）一年前已經開始面對呢類問題，唔使特登去避。」

英皇群星人人彈起。	阿Sa與William要祖兒拉攏才肯「合照」。	基仔為慈善唔夠瞓也瞓身支持。

基仔會缺席頒獎

提到好友何韻詩跟黃宗澤為新戲街頭激吻，祖兒說新年有機會的話會入戲院支持：「咁威水？旺角人海入面咀會好尷尬喎，勁呀！我套《DIVA》都拍晒啦，不過應該唔會同佢打對台。（有冇佢咁激吻？）我同胡歌唔係咁做法，不過我睇完佢哋張相都唔覺得好激啫！」

基仔則透露埋頭苦幹為DVD剪接，小睡兩個鐘就出席支持今次活動。年底各大頒獎禮即將舉行，基仔說：「我未必去晒四個頒獎禮，因為有工作一早已經接咗。（擔心唔去冇獎？）參與過咁多年，唔係會太緊張呢啲，今次係因為有工作簽好合約冇得推。（𢱑銀緊要啲？）係工作緊要啲！」