杏兒整裝攞硬視后
憑《萬凰之王》「沅宛」奸角被熱捧的胡杏兒，已視今晚無綫台慶頒獎禮的視后寶座為囊中物，不過風光贏獎背後亦付出捱餓代價。「準視后」杏兒除了忙拍新劇《怒火街頭Ⅱ》煞科外，昨晚她亦得趕場為《萬》劇結局宣傳。
餓得交關不顧儀態
昨晚七時許，杏兒於尖沙咀髮型屋扮靚set頭後，因無時間食飯要到薄餅店買外賣醫肚。杏兒等保母車接送期間，餓得交關不顧儀態，當街忍唔住偷聞薄餅香味，似想在街頭偷食。不消數分鐘，保母車從就近停車場駛出，將冇啖好食的杏兒接去幹活。
對於被一致看好摘后的杏兒，大戰前夕仍忙到「甩轆」，她笑言亦有好處，因根本無時間胡思亂想，避免因諗得太多而被壓力纏繞。杏兒若順利稱后，更考慮會在台上公開與緋聞男友黃宗澤的關係及多謝對方。
杏兒昨日接受電話訪問時對能成為大熱，很感激大家支持。她說：「我要叫自己盡量放鬆，唔想畀自己太大壓力，靜待頒獎禮來臨。其實自己都control得好好，因為近日太忙，呢幾日劇集又煞科，連續幾晚都通宵，今朝踩到07先收工，今晚做完《萬》結局篇宣傳，又要返廠開《怒Ⅱ》通頂到第二朝，根本冇時間畀我胡思亂想。同事叫我做『視后』，我都叫佢哋唔好咁樣講！不過有樣嘢我好感動，因四方八面嘅fans已嚟到香港撐我，個個都覺得我好似攞梗！」
考慮公開男友身份
問到若真的封后會否在台上公開與緋聞男友黃宗澤的關係？她說：「諗諗先，到時你咪知囉！」另外，對於無綫高層陳志雲化名EGGZERO開微博來暗撐杏兒攞視后，杏兒指任何人撐她都會感謝。
文：影視組