天華吹雞造勢稱帝
台慶視帝視后今晚揭盅，雖然無綫今年改新制猶如選特首般嚴謹，要今早十時半才有終極結果，但杏兒面對最大勁敵陳法拉因「面癱」無心戀戰可說一枝獨秀，而天華亦在高層意向中被睇高一線。兩位準視帝后雖然穩操勝算，但男方昨日繼續到屋邨進行最後拉票，杏兒亦set頭扮靚以最佳狀態攞獎。
被喻為視帝大熱的謝天華，繼早前於網上「吹雞」呼喚「Laughing哥」支持者投票後，昨日再度出擊，於活動後到柴灣小西灣邨拉票。他從褸袋內掏出代表Laughing哥的王冠頭五蚊銀，並大嗌：「邊個支持Laughing哥嘅就過嚟呢邊！」此語一出，附近的街坊即蜂擁而至，把天華逼至麵包店門前，場面熱鬧。
街坊有老有嫩，不少人均以Laughing哥稱呼天華，更表示全家上下瞓身支持他稱帝。有一名五歲小朋友更向天華唱出《潛行狙擊》主題曲，逗得天華笑不攏嘴。期間不少街坊要求與這位準視帝合照，逐一滿足街坊要求，臨走前還幫襯麵包店買麵包醫肚。
準備致謝詞似內定
對於被指為內定視帝，天華笑言每日也有不同傳聞，不過對他來說，現時還是未知之數。問到吳鎮宇是否真的擔任頒獎嘉賓？他謂：「佢出現當然開心，不過並唔係意味住有咩賽果，況且都未安排佢頒咩獎。（鄭嘉穎話鎮宇出現就代表佢冇運行！）我諗嘉穎誤解咗，佢究竟想唔想鎮宇出現？」他坦言近期睡覺時輾轉反側，更未有準備致謝詞：「有晒稿好似有編排，似內定咁，所以如果攞獎我會講真心話，衷心去多謝想多謝嘅人。」有傳無綫為谷天華新片，故只安排嘉穎奪「我最愛的電視男角色」，天華笑謂：「電影版係套劇開拍前已經講咗今年會上映。（如果輸畀嘉穎呢？）要遵守遊戲規則，同尊重體育精神，唔通輸咗去打個冠軍咩？惟有自己再鍛煉好再嚟過啦！」
高層今投票定生死
以往頒獎禮舉行前幾天，無綫眾高層會開閉門會議，決定獎項花落誰家，但為免得獎名單外洩，今年無綫想出一條絕橋，今早十時半才召集彭濟才、陳志雲、樂易玲、何冠中、陳家揚、曾勵珍等高層投票，監製投票部分則於上周五（二日）晚率先進行。不過今年有別往年，要求各監製於指定時間、地點親身投票才有效，否則以廢票來處理。據知幕後支持視帝后均有不同聲音，原定視后乃陳法拉與胡杏兒之爭，不過賽前法拉因健康問題已無心戀戰，結果造就杏兒一枝獨秀，視帝方面，天華與嘉穎於幕後的支持者差不多，但就以天華被睇高一線。
另外，吳鎮宇將為今晚頒獎禮擔任頒獎嘉賓，鎮宇於電話中表示是與謝賢頒視后獎項。鎮宇曾因合作《衝上雲霄》而指杏兒「戲屎」，若杏兒真的稱后，冤家聚頭相信是今晚高潮所在。
文：影視組