黎耀祥:連開三鋪圍骰好難
觀乎歷屆視帝，從未有人冧莊三年，上演帽子戲法。數據證明黎耀祥稱帝無望，但無綫今年繼續蜀中無大將，民望高企的祥仔會否繼續做先鋒覬覦視帝？他一語道破：「好似買大細，連開三鋪圍骰好難，不過林峯未有爆劇上，我仲好有機會！」
口述：黎耀祥 筆錄：專案組
講真，攞咗兩年視帝，今年機會真係幾細，就好似買大細，連開三鋪圍骰好難。今年我只得一套《法證先鋒III》，只可以用不過不失嚟形容我嘅表現，唔係好差，但以牌論牌，嘉穎（鄭嘉穎）喺《怒火街頭》口碑好好，被睇高一線好自然，但林峯未有爆劇上，《花花世界花家姐》收視麻麻，形勢嚟睇，我仲好有機會！
其實做唔做到視帝，收視真係影響好大，即使你紅如林峯，但冇收視做基礎，公司好難話頒就頒個獎畀佢，做視帝真係好講個勢。其實做偶像派又好，做實力派又好，係唔會影響得獎機會，呢個社會係睇商業元素，幫公司賺到大錢，觀眾又buy佢，自然可以贏視帝，係唔係親生仔唔係一個最重要因素，作品成功先係重要嘅考慮。
好似我咁，前兩年就係時勢造英雄，嗰年對手唔多，《巾幗》又爆，時勢造我出嚟，咁咪得咗囉。所以我覺得林峯依家係萬事俱備，只欠時勢，只要有一套爆劇出爐，佢一定可以封帝，正式登基！
影視圈缺小生
其實我都想TVB可以出產多啲小生，冇小生，唔單只TVB係咁，連影圈都係，好唔健康。我記得發哥（周潤發）講過未來影圈係屬於霆鋒，我覺得有啲唏噓，霆鋒都拍咗十幾年戲，唔通真係冇新人後浪推前浪？呢個現象令我大惑不解。