祖兒咀通宵胡歌想Encore
【呂詠雯清遠直擊】容祖兒昨日與胡歌、冼色麗、杜汶澤等到清遠出席英皇電影《DIVA》記者會，穿上白色大露背裝的祖兒性感迷人，與她通宵拍咀戲的帥哥胡歌直言被她電暈，更坦言意猶未盡，想一咀再咀。
祖兒昨日穿上白色大露背裝，腳踏八吋高踭鞋，露出bra帶，性感誘人。向來唱情歌耍家的她前日與胡歌拍完通宵咀戲，她自言不習慣在人前親熱：「我被助手笑我同胡歌拍通宵咀戲，皺晒眉，嘴又冇擘開，其實套戲開拍前，我好緊張。兩小時嘅電影，每場戲都好緊要，情緒要好中。我不嬲唔係主角，今次好多殘酷內心戲，要表現娛樂圈真實一面，我真係冇信心。我演戲雖然唔係零分，但做電影主角真係有壓力，多得監製杜汶澤多次游說鼓勵。」
咀到口腫
期間主持笑指祖兒是票房毒藥，杜汶澤即指周潤發亦曾經歷此情況，但現時已成為七億票房「霸主」。問祖兒介不介意被指是票房毒藥？她說：「仲好，我都咁形容自己，我想用行動扭轉呢種睇法。以前我對鏡頭好恐懼，依家享受拍戲。如果呢部得，我會多啲拍戲。」
男主角胡歌對祖兒演技讚不絕口：「第一次與祖兒合作，她很謙虛。我沒甚麼表演經驗，但她狀態好好、好自然，易相處，沒架子。拍通宵親嘴戲沒NG，因多角度拍攝，咀很多次，起初有一點點尷尬，但一回生兩回熟，親到第三次，便想再親第四次，現在嘴有一點腫。」
擇偶心水
祖兒對於胡歌表示想一咀再咀，她說：「咁犀利？我都係！胡歌係靚仔對手。以往我啲對手多數甩皮甩骨，冇乜好似今次咁浪漫嘅戀愛片段。（胡歌係擇偶心水？）工作上絕對係上等，其實陳奕迅都好ichiban！佢又請我食蟹，我哋都好friend o架！（同片師妹林欣彤來勢洶洶？）佢唱歌好聽，性格率直，呢個圈係需要新血刺激，我當初都係新人啦！（點睇無綫同四大破冰？）等佢哋傾好有公布先，都好想亮相其他電視，如果有歌星賀台慶都好，我鍾意玩！」