栢芝避過水災三口泰瘋狂
張栢芝為了事業、家庭兩兼顧，近期頻做「空中飛人」，日前難得有假期，首度帶兩個寶貝兒子一齊到泰國遊玩，原本快快樂樂的旅程，回港時卻遭人破壞，栢芝經理人直斥有媒體以粗暴的手法採訪，嚴重影響栢芝以及兩個小朋友的人身安全，行為令人髮指！
張栢芝一向十分痛錫一對寶貝兒子Lucas及Quintus，近期栢芝雖然忙於在上海跟張東健、章子怡拍攝新片《危險關係》，但當一有假期，栢芝便不惜「遊機河」，飛返香港陪伴兩個兒子，繼早前回港跟Lucas及Quintus行街街、打邊爐之後，日前栢芝趁有幾日假期，再飛返香港陪兒子。
Lucas放中期假
適逢Lucas就讀的學校有一個中期假，栢芝便決定利用這個小假期「一家三口」到泰國遊玩，今次還首度帶同歲半的細仔Quintus出埠！之前栢芝跟Lucas到外地旅行，Quintus因年紀還小未能一起同行，令栢芝經常心掛掛，如今Quintus已漸漸長大，而且十分健康，所以已可以跟母親及哥哥一起搭飛機，到外地遊玩。
栢芝今次泰國之行，亦特別安排不少適合兩個小朋友遊玩的地方，如室內遊樂場等，雖然近日泰國出現水災，但由於栢芝下榻之酒店遠離災區，所以未有受到影響。
有家長在室內兒童遊樂場內撞見栢芝，據他們所見，栢芝與兩個兒子玩得十分開心，除大玩拋圈遊戲外，亦有玩電動車以及波波池，因遊樂場氣氛十分之好，Lucas亦開心得跑來跑去，栢芝一方面擔心出了汗的Lucas會被遊樂場的冷氣「攝親」，不時拿出毛巾替Lucas抹汗，另一邊廂，又要拿出水樽給Quintus餵水，這個靚媽咪為照顧兩個兒子，都可謂相當忙碌！
三母子很愉快地度過了一個小假期，可惜這次開心之旅，未能畫上圓滿的句號！
當栢芝三母子從泰國回港時，栢芝一手抱着Quintus、另一手拖着Lucas步出機場，即被媒體記者無禮地瘋狂圍住拍照，對此，栢芝經理人周小姐怒斥該媒體的採訪手法，粗暴兼罔顧小朋友安全，令他們極之氣憤。
無禮記者瘋狂圍拍
周小姐表示：「佢哋三個大漢圍住一個女人同兩個小朋友，係咁影係咁閃，完全唔理部大相機會唔會撞親小朋友，細個小朋友得歲半咋，對個小朋友會有傷害㗎，真係好離譜！希望有關媒體可以自律一下，畀番啲空間栢芝同啲小朋友，佢哋都只係想開開心心咁過一個假期啫！」
另外，昨有消息指栢芝因養狗誘發Lucas哮喘病發作，栢芝經理人對此回應：「屋企都冇養過狗，Lucas亦冇哮喘，咁詛咒一個小朋友，有冇搞錯！」
文：影視組