Jocelyn私竇鬧鬼

萬聖節是一個由外地傳入香港的節日，曾於外地生活的人都有很多美好回憶。生於夏威夷的Jocelyn會把屋企變成鬼屋、於美國的陳霽平則被哥哥於頭頂打蛋！何紫綸亦不輸蝕，約埋男友一同着SM裝！其實任何節日，都只是一個藉口讓一大班朋友聚首一堂，度過愉快的一天。

Jocelyn Luko「我爸爸係一個藝術家，每逢萬聖節佢都會將屋企布置成一間鬼屋，仲會喺牆上畫滿公仔。我都會幫手扮鬼，叫爸爸幫我隻手化妝之後，我會匿埋，淨係伸隻手出嚟，仲將啲糖放喺手心，等人嚟拎糖嘅時候就捉住佢！」

陳嘉桓「上年去咗橫店拍戲，萬聖節嗰日打番屋企，點知全家人都出晒去玩！咁我惟有早啲瞓等自己好似冇咁慘咁。」

Marina V.「上年萬聖節，我同朋友去咗泰國旅行，我扮成蜜蜂同朋友去酒吧飲酒。」

吳亞馨「在台灣其實不太流行慶祝萬聖節，但近年我都太忙沒有時間慶祝，我只可以一個人喝南瓜濃湯來獨自慶祝。」

諸葛紫岐「小朋友嗰陣會扮公主、小蜜蜂、天使等等去問人攞糖。不過自己多數都會畀啲大人嚇親，好怕見到啲人流晒血。」

溫碧霞「通常都會扮鬼扮馬同朋友開開心心咁去飲酒。不過我自己都幾怕鬼怪，所以成日都畀人嚇親。

周秀娜「有一年去海洋公園做嘢，我要化鬼妝着埋紅色旗袍瞓喺棺材度。一有人經過就要彈起身嚇佢。」

何紫綸「最激嘅一次，係以前同男友掉轉角色，又試過約埋一齊着啲性感內衣，好有SM feel咁。」

譚晴「喺英國嗰陣，買咗個只要撳一下手掣，就識噴血漿嘅面具。我打算噴污糟我朋友件衫，點知啲血漿向上噴搞到佢成面都係！」

陳霽平「以前喺美國過萬聖節，畀人將一隻生雞蛋打落我頭頂，後尾我發現原來兇手就係我阿哥！」