官恩娜 狄易達 那些年，一起被白眼的日子

同一伯樂拉入行

官：首先多謝你接受我訪問，我同你好有緣，因為大家都係經同一個人——雷蒙介紹入行，好似你同佢都有啲淵源喎？

狄：都唔止淵源o架，係好大緣分，我入行前成日參加跳舞比賽，有次喺個比賽上認識雷蒙，佢行埋嚟問我叫咩名，又畀卡片我，我哋交換電話後又冇乜點聯絡，以為佢諗住搵我教跳舞，後期先知佢想搵我唱歌。

官恩娜說起一些鮮為人知的瘀事時笑爆嘴。	Ella與達仔原來由同一位伯樂引薦入行。	狄易達「舞功」一流，跳舞倒立easy job。
Ella、達仔初出道時也畀人「恰」過。

官：好有趣喎，咁啱我又係雷蒙介紹入行嘅，佢都幾有眼光吖！

狄：記得入行之後喺頭幾場騷，我同自己嘅師兄弟一齊表演，唱完之後就入番後台，雷蒙突然好惡咁捉住我訓話，鬧我做乜唱完唔講多謝，我冇嬲仲好聽佢話，因為好開心有個咁嘅人教我，入行後有人真心同自己講呢啲說話係好難。

覺年輕人難教

官：我好欣賞你係一個好乖嘅年輕人，依家啲年輕人唔會聽人講嘢o架，你教佢，佢會覺得係反對佢，仲會教番你轉頭……有前輩幫自己，即係入錢入你袋，我覺得你真係個好好嘅後生仔。你初入行有冇試過啲「巨星」走埋嚟畀「白眼」或者恰你？之前你都講過有人對你不禮貌行為，大家分享吓。

行兩邊．企側邊

狄：我又唔覺得好辛酸，但有啲唔開心嘅！只係覺得有啲同輩對我認識唔深，佢哋覺得我唔夠高又唔靚仔，不過有啲前輩都對我好好，有時喺頒獎禮見到，佢哋又會畀好多鼓勵我嘅。

官：初初冇人識嘅時候，大會安排啲位可能冇咁好，會唔會覺得點解咁對自己？

狄：好多時都會，位置嘅嘢唔只淨係我留意到，我啲同事或一齊跳舞嘅師兄弟，都會覺得有冇搞錯呀，安排啲咁偏嘅排位o架？

官：係咪覺得大家都差唔多年資出道，點解對方可以企中間，係咪佢公司大啲先？點解我坐側邊等啲人睇唔到我？

勁囂宣傳人員

狄：我反而唔介意企側邊，但有時係一份小小尊重，有時啲工作人員會當你冇到，就算你明明企側邊，佢都唔當你喺度亦唔會叫你先，總會有呢啲發生。

官：係呀！講起我唯一一次畀工作人員白眼，嗰時係我初入行頭幾個活動，有個宣傳人員帶住依家已經冇做嘅女歌手出嚟，佢覺得好似帶住個巨星咁，態度勁囂張，見到我就抬高個頭用個鼻望住我，啲眼神完全係唔尊重人……近幾年我都有撞番呢個人，但佢啲態度就唔同晒，佢試過一見到我就話：「喂點呀？呢排好忙呀？新廣告好靚呀，話咗你得嘅！」

狄：再見番呢種工作人員都幾尷尬，心裏面叫自己唔好記住呢啲嘢，同埋盡量同呢啲不懷好意嘅人保持距離。

甩鞋楔踭瘀到爆

官：講番你之前提過發生嘅嘢畀大家聽。

狄：都係做新人時嘅頭幾個活動，大家一班歌手企晒喺台上，突然有個歌手同隔籬嗰個講：「我撐你，佢又矮又樣衰！」

官：邊個歌手講呢番說話我就估唔到，但聽嗰個我估到。

狄：哎呀，唔好估啦，呢啲嘢都過咗去……我只係嬲佢當住我面前講。佢哋咁做，反而會激發自己爭氣啲！同埋我都試過喺某台嘅大騷上，畀個幕後工作人員當我係dancer，仲聲大夾惡趕我走，雖然當時我冇點出聲，但真係好唔開心。

官：咁老土o架，小學雞嚟o架？有冇為呢啲事喊過？

唔可以被睇死

狄：喊就唔會，一定唔可以喺台上喊咁肉酸，通常發洩喺台上，我要勁過嗰個人，所以會比平時出多一倍力跳，唔可以畀人睇死。

官：喺舞台上表演會發生好多趣事，你成日喺台上跳舞係咪有好多深刻嘅嘢？

狄：有好多o架，試過好型咁出場，想喺第二層跳落第一層，當日對鞋已經綁得好緊，但一落地竟然發現唔見咗隻鞋，原來卡住咗喺樓梯，惟有好chok咁望住前面，慢慢行番上去着番對鞋，真肉酸！亦有次着白色褲跳舞時擦損隻腳，搞到邊跳邊流血……

官：我有次喺個晚宴騷上唱快歌，但我對高踭鞋就楔住台上條隙，因為對腳郁唔到，惟有全程喺度「un吓un吓」，唱完成首歌都冇辦法掹番隻腳出嚟，全場人係咁望住我，我惟有踎低扯番隻腳出嚟，笑笑口扮冇嘢離開，真係瘀到爆。

記者：倪小珊

攝影：吳文聰

髮型：Eve Chiu

場地：千鶴日本料理@都會海逸酒店