薛凱琪遇非常乞丐好心無好報

以禮待人是一般人必有的操守，不過日常生活中都難免會發生不愉快事件。身為品牌寵兒的陳慧琳，到名店購物時竟曾遭「白鴿眼」。最有趣的是薛凱琪施捨乞丐時，被嫌棄金額少，遭即時「回贈」！

蔡穎恩「搭港鐵嗰陣，啲男仔見到我，會特登同我講『嘩！o靚模喎！』雖然好無奈，但係我都會報以微笑。因為自己都要以禮待人。」

陳嘉寶「試過搭港鐵嗰陣，迎面有個男人，我煞唔切掣，佢企定定等我撞埋去。我同佢講『睇路啦！』佢就好惡咁指住我嚟鬧，好大聲咁鬧咗好耐。」

薛凱琪「去歐洲旅行，見到街邊有個乞丐，我就將我身上嘅散銀畀晒佢。不過我行行吓見到地下有嘢碌返過嚟，原來佢嫌太少，畀返我！我唔係覺得佢冇禮貌，不過覺得好好笑囉，始終每個地方文化唔同。」

傅嘉莉「有次開工，其他model以為我唔識講中文，就喺我面前用中文話我唔好，其實我願意接受佢哋嘅意見，但係喺人哋背後講人唔係幾好。畀人話當然唔開心，不過都要繼續扮好開心，同埋keep住用英文講嘢，費事尷尬。」

Alice B.「我試過喺香港一間好高級嘅餐廳食嘢，但係啲waiter態度好差，佢哋唧都唔笑，淨係落咗單就行開，完全冇service可言！我畀得咁多錢去食，應該要有番合理嘅服務質素囉。」

周汶錡「我未試過畀人不禮貌對待喎！可能係因為我個人少同人講嘢啩。香港人全部都好好、好有禮貌，我相信唔會有人故意挑釁其他人嘅。」

陳慧琳「有次喺法國去咗一間睇起嚟好普通，但係原來好高級嘅舖頭買枕頭套。我梗係要摸吓啲質地，睇吓舒唔舒服。一問個Sales價錢，我就『嘩！』咗一聲，之後話唔買啦。點知我再睇其他嘢嘅時候，個Sales直情叫我唔好再逗（貨品）！使唔使咁白鴿眼呀！」

呂慧儀「去韓國旅行，見到飲咗酒嘅男人好粗魯，經過佢哋嘅時候，佢哋好大力咁推開我膊頭。我嗰時諗嗌唔嗌非禮好，不過就算嗌咗都冇人識聽。想同佢理論，又雞同鴨講，所以都冇辦法。」

唐貝詩「嗰年我十六歲生日，去咗個慈善ball，點知突然畀人問：『十六歲，可以做咩（性行為）啦喎！』我都唔識反應，覺得好唔尊重，所以發脾氣走咗。」

王子涵「有次喺英國住五星級酒店，嗰度包埋早餐。我落去食完早餐，個waiter話我食完唔畀錢！仲扯手扯腳！我叫佢check番，佢發現佢錯咗，但係都冇同我道歉。最後酒店寫咗封道歉信畀我。」

薛凱琪遇非常乞丐 好心無好報