錢國偉大街大巷搞女友Bra帶
金牌監製錢國偉，近年與女友「雜果賓治」陳菀蔚經常形影不離，日前兩人拍拖到佐敦行街，錢國偉除了做「阿四」之餘，期間看到女友的Bra帶外露，即上前為對方整理，盡顯體貼一面。
向來緋聞多多的監製錢國偉，經常被拍得與不同女伴夜蒲，甚至攬攬錫錫，可謂艷福不淺。不過，錢國偉自從搭上「雜果賓治」陳菀蔚後，似乎已修心養性，即使外出夜蒲，亦會孖住女友現身，可見兩人感情穩定。
拖到實夠體貼
日前傍晚7時許，身穿背心短裙、腳踏高踭鞋的陳菀蔚，孖住監製男友錢國偉到佐敦行街，經過約兩小時血拼後，兩人已大有斬獲。錢國偉更放下監製身份，甘願做「阿四」，手拿着四、五袋戰利品，而陳菀蔚則只拿着一袋，相當輕便。
未知兩人是否買到冇晒錢，錢國偉隨即到附近港鐵站撳錢，期間當兩人行樓梯時，為怕穿高踭鞋的女友失平衡，錢國偉全程拖實對方，極為體貼。
外賣女友話事
兩人之後途經附近一間小食店時，錢國偉見女友嚷着肚餓，即上前購買，並任由女友話事。等候外賣期間，兩人站在店外有說有笑，錢國偉看到女友的Bra帶突然外露，懶理當時自己處身大街大巷，急急上前為對方整理，之後又攬住女友，態度親暱！滿載而歸的二人，接過外賣後便步往附近停場取車離開。
文、攝：追蹤組