胡敏珊連吞12蟹 初秋最強
踏入秋天，又是吃大閘蟹的季節，充滿蟹膏的肥美大閘蟹確是令人食指大動，連一眾藝人Model都不禁為之瘋狂！謝婷婷每年歎大閘蟹都是爸爸謝賢專人服侍，為她剝殼拆肉，認真享受；而胡敏珊竟試過一次過吃12隻大閘蟹，認真厲害！
MAX & Co.派對
文詠珊
「我食唔到大閘蟹，因為我唔鍾意食蟹膏，接受唔到嗰種太濃而且有啲腥味嘅食物，海膽都接受唔到架。朋友好鍾意同我食大閘蟹，因為我一定唔會同佢哋爭食。」
諸葛紫岐
「我好鍾意食大閘蟹，但係唔敢食咁多，因為好毒。我最多試過一次食６隻，食完第二日即刻出粒粒，以後就學識要適可而止。」
薛凱琪
「我好鍾意食大閘蟹，最多一次食５隻，但食到頭暈。記得有次去朋友屋企食大閘蟹，大家諗住食完出去飲嘢，點知食完大家都覺得好虛，最後留喺屋企睇DVD，無出街。」
吳雨霏
「我唔食得蟹，因為會皮膚敏感，但唔係每種蟹都唔食得，其實我好鍾意食蟹，但只可食少少，我上次食過大閘蟹，之後就出粒粒，可能大閘蟹太毒。」
熊黛林
「我好鍾意食大閘蟹，最多可以食４隻，不過食完就會生粒粒，所以一定要記住飲薑茶呀！」
《香港鐘錶展》
胡敏珊
「最多試過一次過食12隻！不過我淨係鍾意食啲膏，啲腳就會剩低晒，成日都畀人鬧浪費，所以我會叫工人將啲腳用嚟整蟹粉，第二日放落蝦子麵度食，真係好好味！」
鍾浠文
「因為媽媽係上海人，每年都會煮十幾隻大閘蟹，但嚟到香港只可以同朋友一齊食，試過有次自己煮不過味道麻麻，因為我將蟹放入水裏面淥，但原來要蒸！以後都唔敢再煮啦。」
姚佳雯
「我每年都食好多，有時會成箱成箱咁買返屋企。不過我媽媽真係好好，佢知我鍾意食啲膏，會畀晒我食，一次過可以食10隻！我都覺得自己好過分，哈哈。」
《新店開幕》
丁子高
「前年我食大閘蟹食到暈！一次過食咗8隻，第二日好唔舒服。因為我屋企係上海人，一到9、10月就狂食！不過依家知道鍾意食都唔可以食太多。」
謝婷婷
「年年食大閘蟹，爸爸都會起晒啲蟹肉出嚟畀我食，佢好專業架，有晒程序，食完仲會幫我切埋生果！媽咪就負責準備啲工具同埋煮醋，我就負責食囉！」
楊汀叮
「最鍾意食到飽，最多可以食４隻，我寒底，試過食到胃唔舒服。Angelababy仲誇張，可以一次食10隻，仲會加紅糖同醋，但可能佢係上海人，所以受得。」