古天樂麻甩派對「老婆」冇份
昨日驚爆「秘婚」的古天樂，前晚出席萬聖節活動時心情大靚，除了取笑同場的陳嘉桓「打死鬼」外，又大講「老婆」壞話，並預告萬聖節將參與「戒女」的麻甩派對！
備受腳傷困擾的古天樂，繼早前被網友公開回鄉證後，昨日又失驚無神爆假婚訊，令他大感無奈！雖然近期異常黑仔，但古仔前晚與陳嘉桓（Rose）出席《2011迪士尼黑色世界》時仍無懼「搞鬼」，就算熱得汗流浹背仍「罕有」搞Gag自娛！
萬聖節P包到冚
撐拐杖現身的古仔透露已全面復工，更多了不少宣傳工作，可謂因禍得福！問到酬勞是否全用在醫藥費上，他說：「呢啲有保險o架嘛！」他又表示數年前已打算與舊同學扮鬼扮馬開萬聖節P：「有諗過扮蜘蛛俠，不過年年都唔喺香港，今年終於可以喇！（今年扮咩？）唔話你知，總之一定由頭包到腳，保證你哋認唔到！」未知是否遭「婚訊」煩親？古仔竟大講「老婆」壞話：「啲同學話千祈唔好帶老婆去，因為啲女人一驚就會搣你，隻手實瘀晒！」
笑陳嘉桓打死鬼
至於穿上四吋高踭鞋扮「米妮」的Rose，否認刻意增高「超越」古仔，她說：「我唔夠膽一個玩鬼屋，驚錯手打親人！（搵師兄杜宇航陪？）應該得嘅！」古仔即笑言擔心「鬼怪」的人身安全：「佢哋兩個打低廿個喎！」
完成工作後，古仔於十時四十五分以「黑衣人」造型現身機場，繼續依賴「第三隻腳」步行的他，拒再回應婚訊：「唔講喇！（粉絲太愛你，所以有幻想？）唉……」隨即匆匆入閘。
文：影視組