衞詩拚搏儲錢非洲建校

孖女歌手衞蘭(Janice)、衞詩(Jill),自後者09年在日本藏毒被捕入獄後,第一次正式一同出席活動,為教會作見證,感謝教會令她們由不開心的人生中重獲快樂,而曾經只愛吃喝玩樂兼吸毒的衞詩更良心發現想去非洲起學校!

衞蘭、衞詩姊妹昨日現身由戲院改建的教會做見證,大談此教會帶給她們人生的改變,今次活動是二人自衞詩藏毒事件後,首次正式一同出席。

向前行拒回頭

衞詩曾經於09年在日本與前男友關楚耀一同藏毒被捕、被拘留獄中60天,期間有自殺念頭,人生陷入谷底。曾坦言吸毒的錢夠買法拉利的她說:「我依家好想去非洲,起一間學校,之前完全唔會咁諗,(淨係吃喝玩樂?)係,個人好自私,係呢間教會拯救咗我,令我重獲自信。(有咩工作去搵錢起學校?)會做好音樂儲錢,唔係想紅,而係真係鍾意做。」她更表示會將之前書展出自傳的收益捐出。

問衞詩有否想過回歸舊老闆黎明的公司做音樂?她虛心說:「唔會諗喇,希望向前行,(驚佢唔接受你?)我哋係和平分開,(嬲佢?)唔會嬲,(佢仲嬲你?)我做錯事佢有權嬲。」

衞蘭睇化人生

至於姊姊衞蘭則表示該教會令她由不愉快的娛圈生活中重得喜樂,因為教會有很多人幫她祈禱,並接受她。提到她與無綫的合約問題,她說:「都係公司搞,我唔會理有冇約,公司冇通知我,(冇咗無綫會好大損失?)神180度改變咗我,令我唔太注重得到啲乜,(唔上進?)會盡力去做,明白好多嘢都唔係我控制,最重要係搵到平安。」

文:音樂組