陳奐仁體會實幹換奇迹
音樂人陳奐仁（Hanjin）在音樂路上苦幹十年，推出首張國語專輯細數十年故事，近年由幕後玩到幕前，出碟、舞台劇再拍埋電視劇，一個個機會接踵而至，他深信肯努力去做，「奇迹」便會出現。
Hanjin過去十年默默為音樂耕耘，為別人做唱片監製、寫歌填詞，終於今年為自己炮製首張國語專輯《誰是陳奐仁》，以十六首歌曲猶如紀錄片般，唱出他十年的音樂生涯。他說：「由當年理想澎湃嘅小朋友開始追夢，但現實往往挫折重重，令你迷失，又尋回自己，呢啲經歷令我領悟到，人只能控制肉體同思想，其餘都係可遇不可求，所以能夠超越零嘅成績，都應該感恩。」雖然沒有唱片公司支持，但他憑個人能力和有限金錢推出國語碟，雖未知反應如何，他都覺得賺了。
捧新人獎父開懷
說到父親當年反對他做音樂人，Hanjin笑言：「佢唔係用反對，佢字面上係咁講嘅『阿仔，音樂係一個好嘅嗜好……』但自從我金像獎攞咗新演員獎後，佢就冇再講嘞，原來老竇係想我拍戲，唔想我做音樂，係幾好笑o架。」而今年Hanjin兼顧更多幕前工作，參演首個舞台劇及電視劇，更與滕麗名演一對。Hanjin不諱言通常「最勁的事情」，總是在意料不到下出現「奇迹」，像十年前被張學友揀了他兩首歌來用，然後陳奕迅又找他為半張唱片做監製，到第一次拍電影，他就幸運地贏到個新演員獎，全是突如其來，所以，做人處事執着沒有用，努力做好反而奇迹會隨之而來。
有四得自然快樂
Hanjin感到現今城市人都活在不快樂下，他希望透過歌曲和演出，讓人的快樂指數提升。他謂：「快樂很簡單，有得食，一日三餐，有得瞓，即有安身之所，有得屙，代表身體健康，有得畀，即有給予別人的能力。呢四樣雖然係做人最基本嘅事，但有齊呢四樣就如擁有快樂的能力。」
文：音樂組 攝：李柏儒