徐正曦內地升呢勁賺七位數
寰宇藝人徐正曦近年在內地人氣急升，短短一年接拍了三部偶像劇，吸金量接近七位數港元。每次拍戲都全力以赴的阿曦，最近拍劇時誤傷手掌要入院縫針，立即獲師姐江若琳及好友唐嫣傳短訊慰問，認真好人緣。
曾拍過《B＋偵探》、《愛情故事》及《關人7事》等電影的徐正曦，雖然在港知名度不及師姐江若琳，但原來在內地已相當搶手。高大俊朗的阿曦早前已憑內地劇集《男兒本色》打開大陸市場，之後偶像劇一部接一部，更兩度與靚女內地女星唐嫣合作，短短一年內狂接三部偶像劇，荷包一下子進帳接近七位數，認真和味。問到是否豬籠入水？阿曦笑謂：「實際賺幾多我冇理，啲錢我全部交畀經理人，佢幫我內地投資。」
太投入唔知痛
向來工作認真的阿曦，早前拍偶像劇《美麗e時代》時不慎弄傷手掌，傷口更長達吋半兼流血不止，工作人員見狀即將他送院。阿曦憶述時猶有餘悸：「當時我拍緊一場發脾氣嘅戲，唔知係咪因為太投入，拍碎咗隻玻璃杯都唔知，直到工作人員話我流好多血，先知自己受傷。當時我真係一啲都唔痛，但縫完六針後就開始痛，要食止痛藥先開到工。」
江若琳及唐嫣得悉阿曦受傷，即發短訊慰問，並擔心他因此留有疤痕。阿曦笑謂：「男人多條疤痕無所謂啦，仲有滄桑味！不過醫生話如果戒口戒得好，都唔會有疤嘅。」
文：影視組