馬賽許諾家人抗污保不失

富古典韻味的馬賽頻頻被安排參演古裝劇，她在新劇《九江十二坊》扮演刁蠻小姐，對好姊妹鍾嘉欣有情有義，與敖嘉年身份懸殊的愛情愛得義無反顧。現實中馬賽就未試過劇中的轟烈愛情，她笑謂：「角色唔理父親反對都要同敖嘉年一齊，現實就冇試過咁激烈，最曳都係讀書時瞞住屋企人拍拖，發吓豆芽夢。」

非吳卓羲女友

馬賽去年躋身吳卓羲緋聞女友之列，雖然也明白藝人與緋聞分不開，但當發生在自己身上卻相當困擾，當時飽受壓力，她表示：「我哋只係普通朋友，但竟然可以無中生有寫到咁，嗰排壓力都好大，爹哋同媽咪都會畀親友問係咪真o架，令到家人都有壓力，佢哋當時都覺得娛樂圈係大染缸，都問我係咪真係咁想做娛樂圈呢？我叫佢哋畀三年時間我發展，除咗要做出成績，仲要證明我喺娛樂圈都可以做番一個樸實嘅藝人，我同以前一樣咁踏實。」

馬賽表示家人擔心她被娛樂圈這個大染缸污染。

馬賽與吳卓羲傳緋聞，親身感受無中生有的滋味。（資料圖片）

加速心理成熟

馬賽隨着經歷與家人齊齊成長，對花邊新聞也以平常心看待，現時二十四歲的馬賽自言比同齡朋友成熟，她笑謂：「我覺得自己成熟得好快，心理年齡應該係三十歲，明顯同身邊嘅朋友有分別。」

馬賽難忘與「視帝」林保怡合作，起初是戰戰兢兢，但保怡實情卻相當友善，不時主動指點，她說：「佢好主動同我傾偈，問我鍾意睇咩戲，教我睇啲好戲唔係睇一次，係要反覆睇十次，先可以學到人哋嘅演技，自己都有跟住做，不過暫時最多一套戲都係睇過四次，哈哈！」

髮型：Sidney@HAiR

服裝、場地：Love Girls Market

採訪：影視組　攝影：黎志輝