草蜢自我挑戰跳入影壇

入行26年的草蜢近年常在紅館開唱，每次都必定全場爆滿，而他們近期的紅館演唱會中，蔡一傑更忘我半裸露肌，除剩短打晒「神鵰」！他們在樂壇中，絕對是聲色歌舞的殿堂級人馬，但問到三子除音樂外，他們有甚麼想挑戰？

音樂外想試試……

蔡一智說：「好恨做電影，好想搵一間電影商做一套屬於草蜢角度、思維嘅電影，因為音樂係我最愛，第二就係電影！（有咩主題想拍？）劇本好的話都可以，我其實之前都做過MV導演，所以我做導演的話，拍長啲就係電影！」他接着說：「我就想拍搞笑戲！我哋咁多年都好多好笑嘢，有次去登台，套衫好窄，我全身肌肉都脹爆，唱到最後一首真係逼爆咗褲襠，好彩冇人見到。」阿智笑說：「其實搞笑的話，我哋三個可以拍古裝！又新鮮、又有睇頭！」阿傑即大笑說：「我真係冇諗過呢樣嘢！」

問一向風格妖艷的他們可接受性感戲？他們笑說：「依家啲人真係好鍾意睇事業線，我哋都唔知有咩畀人睇！（股罅？）留畀女星做啦！」

籌款改善公院設備

他們表示除了做音樂、拍電影外，對做善事也會不遺餘力，蘇志威（阿細）表示他們近日為醫院擔任慈善大使，將參與10月9日的步行籌款，為求改善香港公立醫院的設備，而雖然阿智與阿細的女兒都在私立醫院出生，但他們說：「私立醫院可以分擔公立醫院嘅負擔，有條件嘅人可以選擇。」

採訪：王羽飛

攝影：鄭家俊

場地：拉斐特婚禮統籌