軒仔熬底惡補唱功
張敬軒將於11月跟港樂合作開騷，出名唱得好的他，竟然「熬底」要搵老師惡補聲樂，貴飛售價更不敢定得太高，身為唱家班的他都如此謙遜好學，其他走音歌手真的要汗顏了！
第一次跟港樂合作的軒仔，十分重視今次的演出：「坦白講，自己真係有啲『熬熬哋』，雖然唱歌咁多年，但同交響樂團合作，始終發聲、唱歌方面要求好高，自己會搵老師惡補聲樂。」
着靚衫唔跳舞
軒仔入行多年，一直沒機會進修，所以好想藉此機會跟老師上課，花數月時間好好進修，將所學在演唱會上盡騷哥利。
由於今次演出以音樂為主，令軒仔可以避開至弱的一環「跳舞」，他笑說：「太好嘞，始終音樂性強啲嘅表演啱我啲。」為了彌補觀眾視覺上的享受，軒仔會在戰衣上落重本，三套衫共值逾30萬元，他說：「由大師陳華國幫我搞，希望集潮流、傳統於一身，唔想太隨便，其實我都有諗過着裙，今年男裝幾興將女裝元素擺入去，今次演唱會有PART幾迷幻，可以着潮啲。」
問會否剃腳毛着短裙？他哈哈笑說：「短裙啱女仔着，今次歌衫以密實為主，亦唔會赤裸上身，等我操吓先。」
門票唔敢咁貴
至於票價方面，上次軒仔的紅館騷貴飛賣$680，今次在Star Hall演出票價只是$480，他謙虛說：「之前睇過學友哥嘅騷，佢咁大製作都係$680，自己唔敢賣得咁貴。」為了配合演唱會，軒仔還寫了首歌《Stop The Time》，希望歌迷鍾意。
採訪：音樂組
場地：The Habitat Lounge@The East
化妝：Hetty Kwong
髮型：Aaron@Hair Culture