小谷有辦睇 Niki等做人妻
婚姻是很玄的東西，奇妙之處不只在於用時間焙出來，亦可因一眼之緣而令你非君不嫁。周麗淇（Niki）早達適婚之齡，在谷祖琳身上卻尋找到另一個自己。急甚麼？若上天注定賜你一個男人，又何必計較刻下單身不單身？
周麗淇：周 谷祖琳：谷
不為結婚生仔定期限
周：婚後第一次見你？
谷：係，時間過得好快。
周：今日我想同你講女人嘅愛情觀，因為你最有資格講。喺感情上，我覺得你嘅例子係一個好好嘅教材。你識你老公時間好短，就步入人生另一個階段，我想問點為之結婚對象。
谷：其實講到結婚對象，只要你同佢接觸過，係真係知架，一企埋就知，你會覺得：「咿！係你呀！」
周：係，有啲就算你拍咗十年、廿年拖，但總唔係你結婚對象，所以我真係好好奇。
谷：兩樣我都試過，嗰個只要係你真命天子，就會好明確。
周：我等緊呢個感覺，可惜未有。
谷：真架，真係好神奇，自己好男仔性格，唔會成日諗夠鐘喎，要結婚喇！所以我同老公結婚真係幾出奇，冇諗過真的結婚，亦冇諗過生仔，只諗住快快趣過埋呢一生人就算。
周：你係一個女強人，有自己嘅事業、舖頭，乜都自己搞掂，真係好tough。你結婚，印證呢個世界係冇plan。
谷：咁你呢？有冇諗過結婚生仔？
周：我有諗吓囉，但幾時真係唔知，唔好畀太大壓力自己，有好多親戚朋友會問我幾時結婚生仔，但唔想因為周邊嘅壓力影響自己事業同諗法。我諗到時有就有啦，唔可以抵擋。
谷：其實我真係唔明啲女仔點解要三十歲前結婚，點解呢？係base on乜嘢呢？
周：係咪女仔有心理關口呢？我覺得女仔要有自己獨立思想，唔一定要跟住社會嘅模式，冇一樣嘢係需要有模式。如果係因為好似阿媽、阿婆年代咁，一定要三十歲之前結婚，之後一定要生仔，否則太遲驚生唔出，太多呢啲掣肘做人係唔會開心。
谷：係囉，點解女人唔可以有自己事業先？其實結咗婚嘅人都知道婚期係冇得set喎，有啲人真係七十歲先遇到喎。
婚後冇路走互相遷就
周：咁你依家婚姻生活點呀？
谷：我好好呀，我有問過朋友結婚同拍拖有乜分別呢？原來就係會更加遷就，以前拍拖嗌交可能會嬲幾日，但依家就只會嬲幾秒。因為結咗婚係冇得走，惟有遷就、包容。以前拍拖會諗唔啱就散，依家唔係咁囉，更加絕對唔會諗到離婚呢一步。
周：其實我拍拖以來都識得包容，唔會咁易話走。我覺得唔係結唔結嘅問題，而係人大咗，可能廿幾歲時會刁蠻啲，到咗三十歲就唔會再係咁，無論思想空間或思想模式都唔同。講真結婚都可以離婚，問題係呢個係成熟嘅表現，要去接受一個同你生活模式唔同嘅人生活囉。
谷：再具體啲講啦，以前鬧交會自己有多啲空間去諗嘢，會醞釀嬲嘅情緒；依家就冇可能次次返外家，唔想畀人知自己係離家出走，又唔想去租酒店，惟有焗住唔嬲。其實唔嬲真係好易，只要佢或我是但講一句就搞掂，依家就係領略到呢樣嘢。
緣分有前世今生
周：咁同居得唔得呢？
谷：都爭啲架，同居都未結婚，一日都會高姿態。但結婚後又唔覺有任何委屈，係另一樣嘢，到時你會知架喇！其實我都想知，你有冇結婚嘅憧憬？
周：有，當然有啦，畢竟我性格求知欲好強，想知道結婚係乜嘢嚟架，當然我唔係想為結婚而結婚，而係想搵一個對象可以同佢溝通到及生活。可惜吖！到依家仲未有呢種感覺。
谷：真？咁耐都冇？
周：拍拖就有囉，我以前拍拖，會想結咗婚都有自己嘅事業，我好貪，真係好想有更多事業。
谷：唔驚！我結婚都有自己嘅事業。再具體啲講，只要佢係你老公，你心裏就有好多說話想同佢講，有時望住佢會覺得，呢一世就算淨係跟佢都好滿足，成日會有呢啲嘢喺個腦轉，就算我乜嘢都唔做，只係對住佢都會好開心。
周：我都希望搵到呢個人！
谷：有架！一定有呢個人。我覺得緣分呢啲嘢係有前世今生！
周：係，我都覺得有，我信係有緣分。
谷：其實朋友都有緣分架！好似我同你咁都唔係成日見，感覺click到就clicko架喇！
周：但朋友同老公嘅緣分係同一樣嘢，如果係佢，就唔需要特別遷就，絕對唔會出現南北兩極嘅嘢，以後感情就會更加容易維持。我試過好遷就、順對方意，但原來係唔得架！
後記
訪問當日，正值暴雨來襲，Niki和小谷不約而同致電小記因塞車可能遲到。最終這對好友真的未能準時到達，因為她們早到了，Niki說：「呢個係小谷婚後第一個訪問，點可以遲？」小谷也說：「Niki係我好朋友，我更加唔可以遲！」朋友這東西，學黃興桂話齋，真係「有今生冇來世」！
文：阿霆
攝：吳文聰
場地：Red（ifc）
髮型：Debby Kwan@Hair