張栢芝倒米寸爆王晶唔掂

與謝霆鋒協議離婚後的張栢芝前晚首度在港公開亮相，一身Jean Paul Gaultier碎花Jumpsuit，配上粟米爆炸新髮型出席電影《無價之寶》首映。栢芝事先張揚不接受傳媒訪問，只在台上和司儀對答，繼而配合祝酒切餅儀式，短短逗留十分鐘即閃，仍夠時間寸到爆。

王晶逆來順受

早前有指內地投資該片之公司炮轟栢芝收千萬片酬，卻不願意履行合約出席宣傳活動，之後栢芝經理人在微博澄清曾掀罵戰，前晚栢芝於台上句句有骨，更寸爆劇本唔得。當司儀問到和Lucas拍戲趣事，栢芝說：「佢都係做番自己，平時都係我幫佢沖涼，今次都係將沖涼、瞓覺做出嚟，佢都唔知自己拍緊戲。」及至問到Lucas有否表現出演戲天分？栢芝說：「佢有我嘅DNA，好鍾意改對白、爆肚，可能佢覺得編劇唔掂，成篇對白一句都唔跟，自己作，做到小孩子天真一面，喺香港拍咗一日，好開心，好舒服。（有冇叫住要再拍呀？）冇呀！可能啲劇本唔得啦！」踩完編劇再踩劇本，身兼出品人、監製、編劇和導演的王晶面不改容，笑容滿面地回應說：「等佢18歲拍部溝女片畀佢啦！」

栢芝「攻勢」浪接浪，王晶一於笑住化解。

莊思敏和伍允龍有份演出，恰巧伍允龍是霆鋒的好友。

對於栢芝不肯宣傳傳聞，王晶直言：「佢今次唔係唯一嘅宣傳，之前喺廣西做咗一次，開鏡又一次，但作為製作方梗係覺得愈多愈好啦！（栢芝今次都唔肯接受訪問？）影相囉！因為你哋問佢嘅嘢，佢都冇咩可以講到。（覺得栢芝配唔配合到宣傳？）我都拍咗幾百部戲，唔會強求啲朋友做啲唔想做嘅事。（栢芝以後接戲係咪都係咁？）我都好耐冇見佢，要問番佢新公司。（會否再同佢合作？）睇成個走勢囉，暫時都冇適合。」

栢芝昨日心情甚佳，表情多多。	栢芝和曾傳緋聞的鄭中基、伍允龍、莊思敏等一起切月餅。	自與栢芝協議離婚後，霆鋒無後顧之憂，於工作上全力搏殺。（資料圖片）

暫時無意合作

問到是否因為栢芝嗌價貴了不少？他笑笑口說：「佢向來都唔平，結婚前都唔平。」問到會否趁機和栢芝傾離婚心情，王晶說自己半個Uncle身份，很少去講私人事。

其實栢芝全程心情勁靚，甫到場便和曾傳緋聞的鄭中基密密傾，繼而莊思敏、伍允龍等切月餅，期間有條狀餅碎突然「動L」，栢芝和鄭中基相視而笑。

文：影視組