完美一黑

黑色受歡迎原因是timeless之餘,亦易於配搭,最重要是黑色很極端,有一種難以解釋的cool味外,還有一份貴氣。無論是你、我、她與他的衣櫃十居其九都是黑色。然而,這股黑勢力已靜悄悄殺到,眾女星from head to toe都「黑到震」,雖然黑色有修飾線條之效,但着錯裙款都會出事,而星級形象指導郭慶彬(Ricky Kwok)大讚荷里活女星妮歌潔曼着出黑色的簡單高貴,而吳君如的中性態度成功地塑造出烈女味道。

妮歌潔曼

一個字「靚」!一頭金髮配以little black dress,淨係配一對耳環,都已經夠簡單高貴。

趙碩之

裙款剪裁層層ruffled設計臃腫,顯得她略肥兼冇腰線,就算係黑色都着唔出型格潮味,加上佢MK look短髮更唔匹配,整體感覺唔trendy。

官恩娜

裙款太斯文,襯對cross-ankle高跟鞋,穩穩陣陣,無乜出錯位,不過有啲悶,但尚算過關,總算不過不失,但如果加對粗手鈪感覺會更有型格。

吳君如

一向唔賣樣嘅佢近年專走型格路線,無袖恤衫加上黑色harem pants同對ankle boots,好啱,成功塑造中性烈女味道,潮氣盡現,型!

關心妍

身材矮小完全carry唔到條裙,顯得佢腰短腳長,整體比例全錯,仲有種頭大身細感覺,好肉酸,而且髮型又出事,總之錯上加錯。

Avril Lavigne

條裙剪裁同輪廓都好簡單,放喺佢的骰身形上一絕,簡簡單單令人眼前一亮。

楊梓瑤

造型好SM feel,露上又露下太過低俗味,加埋all back髮型,完全暴露佢四方額同兜風耳,將五官缺點盡出。

星級形象指導師

星級形象指導郭慶彬(Ricky Kwok)至今為一眾女星裝身扮靚,包括李冰冰、張惠妹與徐若瑄等等。他有自我一套的審美標準,眼光獨到,曾到巴黎時裝周及高級女裝訂造服睇騷包括Chanel、Christian Dior、Valentino以及Jean Paul Gaultier等等。

GaGa由頭黑落腳

Lady GaGa向來以前衞見稱,近期她可謂黑到爆,經常出席大小活動都全黑上陣,但造型各具味道與形態。全黑色中空裝設計將佢腰位線條盡現眼前,good match一對黑色長boots,雙腿拉得更加修長,不過就略為小肥,如果再瘦啲令造型更perfect。

另外,GaGa加番件長袖恤衫加一個headband,完全換咗另一個造型,整體好有型,充滿型格chic感覺。