Eason做過億保證吐戲揚眉

陳奕迅(Eason)與桂綸鎂首次合作,主演夏永康和陳國輝執導的電影《全球熱戀》。Eason坦言過往主演過的作品雖然口碑好但票房差,自認經常搭沉船,今次他有信心在億萬票房導演領導下,集中港台三地藝人力量打破宿命。

叫好唔叫座感無奈

我一向拍戲都冇諗過係搵錢,我歌唱事業都冇搵,你問我歌酬幾多我都唔敢真係答到你。問我電影會唔會減產?其實今年已經停咗戲,今年已經兩部電影加一部電影配音,夠嘞,因為今次兩個導演上一部都喺內地有過億票房紀錄,今次原來陳奕迅係有份演呢啲戲。以前我邊有試過吖!過千萬都「掹」啦!同張栢芝合作《十二夜》,係一部好好睇嘅電影,但唔收得。同蔡卓妍合作《常在我心》又係好睇,但又係唔收得。《神經俠侶》又係好多人鍾意,但都係唔得,我係搭沉船o架!不過我今次有信心票房過億,因全套戲有郭富城、劉若英、桂綸鎂、徐帆,集合中港台三地咁出色嘅演員。

調配時間遷就女兒

康堤開始成長,好多人問我會唔會減少工作陪佢,但其實佢都開始好忙,就算我唔忙佢都忙。我要喺忙嘅時間調配一下,原來我早睡早起係可以配合到佢。佢放暑假我早睡早起,調校配合番課外活動。早排我先試過同佢去太古城溜冰,佢仲話我好勁,佢話原來Daddy識溜冰,仲會倒後同溜得好快,呢個已經係好好親子樂。

感人演出賺人熱淚

陳國輝:有一場戲講Eason去桂綸鎂屋企,嗰場戲寫得好簡單,但Eason一埋位就被現場氣氛感動到喊,佢係真感動,令我好欣賞。我哋事前冇綵排過。佢事前同我講話佢係一個好難喊得出嘅人,點知我一開機就喊,你知唔知流一滴眼淚係好難,佢喊搞到我都眼濕濕,我都被佢感動到,佢發揮到好大功力,幫我哋故事加咗分,真係好難得。

讚桂綸鎂氣質優雅

我第一次同佢合作,本身我對佢印象係已經好好。我覺得佢係好有氣質、好獨特。佢係一個外向女仔,古靈精怪,但個樣好典雅好outgoing。我好坦白當時我未睇佢第一部作品《藍色大門》,當時佢好細個十幾歲,但聽過佢個名。跟住《不能說的秘密》開始認識佢,佢已經好搶眼,冇特別諗幾時可以同佢合作。今次多謝兩位導演睇得起我撮合今次機會,真係冇諗過可以同佢拍戲。我第一次做男主角就同張栢芝合作,又同舒淇拍過戲,好慶幸亦同過吳君如合演過,全部都係好戲又靚嘅藝人。桂綸鎂都好好戲,係一個好對手,好交流。今次同佢合作有火花,產生化學作用。

不敢「型」戰郭富城

電影總共分開三個故事,我同桂綸鎂一對,郭富城就同劉若英,仲有一個係由Angelababy主演。郭富城喺戲入面做太空人,佢演一定會型過我,我只係做倒垃圾角色。但如果阿城做倒垃圾嘅話,都會型過我啦。不過今次唔係講型唔型,加上我同阿城冇對手戲,同佢唔會有比較。而且我亦未必會想做佢太空人個角色,因為佢個角色要不停吊威吔扮飄做戲,佢fit過我咁多先做到。但最記得2003年,我哋仲係兩個小朋友,一齊拍《重案黐孖Gun》嗰時,大家好好玩。

徐帆識英雄重英雄

戲入面最難能可貴係可以同內地殿堂級演員徐帆合作,第一次見佢已經感覺到佢友善一面,真係一啲架子都冇,佢仲好謙虛咁同我講「好開心可以跟你合作」!徐帆好高貴,真係好正,佢之前嘅作品我有睇過,佢做咩角色都入型入格,可塑性真係好高。今次佢喺戲入面做桂綸鎂、劉若英同Angelababy母親,佢仲笑住同我講「我又要做媽媽,我好似好老」,其實佢真實年紀根本唔係咁大咋!

嘻嘻哈哈掩疲態

Eason是圈中首屈一指的大忙人,同一日內他要兼顧電影歌曲錄音,完成後又要接受訪問。雖然他面露疲態,但又為免影響進度堅持不休息,專業精神令人敬佩。鏡頭前笑臉迎人,鏡頭後他卻累得要命,但不用埋位時他又會生生猛猛,一時瞓地,一時化身「一代宗師」,為現場帶來不少歡樂笑聲。當攝影師叫他埋位,Eason又變得乖乖坐定定拍照,非常享受工作。

口述:陳奕迅 文:影視組