Becky恨北海道披嫁衣
「o靚模始祖」Becky（利梓僑）即將到巴黎、威尼斯拍攝婚紗廣告。已影過逾十輯婚紗照的她自言鍾意婚紗，百着不厭，甚至已諗好日後結婚，會到日本北海道影婚紗照。
十三歲就出道的「o靚模始祖」Becky今年推出首本寫真《First Date》，於書展期間賣出一萬本，現正加印於報攤發售，忙完寫真活動的她將啟程往歐洲拍攝婚紗廣告。
原來她之前因工作關係，已影過逾十輯婚紗相！但今次能去歐洲影就格外特別：「因為我從未去過歐洲，今次會去巴黎同威尼斯，起碼逗留十日，到時可以順便周圍參觀吓！」雖然她着過多次婚紗，但仍然百着不厭：「我真係好鍾意着婚紗！第時自己結婚想去日本北海道影婚紗相，我曾經喺嗰度生活過一排，紀念性大啲，又可以着和服。」
谷淚冇難度
接下來她最想朝演戲之路進發，尤其是愛情電影，她最欣賞陳可辛導演，早年拍攝獨立電影《烈日當空》後令她戲癮大發：「有場戲講我趕我男朋友出街，當時係冬天得幾度，我要露背，只摟住張被，喺屋邨樓下一路喊一路趕我男朋友走！」她事前無做任何準備，導演要她哭便能馬上哭出來，最後愈來愈入戲，眼淚收放自如，演喊戲對她來說可算是零難度！
美女日本通
看過Becky寫真的人都知道，她於寫真入面用日文寫了不少文字。大學主修日文及社會學系的她曾於北海道留學，希望以日文增添寫真的日本風味：「依家我着衫都好日本風，有時會上網訂嗰邊啲衫或者叫朋友幫手買，喺嗰邊住過始終熟路啲！」
Profile
姓名：利梓僑（Becky）
年齡： 22歲
三圍： 32B、 23、 33
身高：162cm
體重：43kg
學歷：城市大學日文及社會學系
簡介： 13歲開始做模特兒，先後參與不少廣告工作，今年推出首本寫真《First Date》，亦曾拍攝獨立電影《烈日當空》
文：專案組 攝：吳文聰