吳彥祖鐵騎追車死裏逃生

Daniel、古仔與劉青雲再結片緣，合拍新片《竊聽風雲2》，期間Daniel化身「港版沙拉保夫」，狂谷肌肉且不少驚險場面皆由自己親身上陣。據悉，電影公司為其「度身訂造」一架電單車，以方便他大玩花式，想不到「偷薄」了的車身只剩六十公斤左右重量，教Daniel駕車時要配合風速，取得平衡更見吃力，而其中一場他駕電單車被後隨大貨車追逐的戲份，竟令帥哥險些命喪黃泉﹗

放大圖片	經改裝的電單車，可作高難度動作。	一場崖邊肉搏戲，幸得古仔身手敏捷，吳彥祖才執番條命。

險變人肉三文治

這場戲絕對稱得上是「玩命之作」，Daniel談起來仍猶有餘悸：「嗰日喺郊區開工，埋位時都算順利，點知以為鏡頭影唔到我，咪停車想U-turn返出大路囉，先驚覺架貨車仲未出鏡，人哋仲高速咁駛緊過嚟，好彩最終個司機醒目，喺離我一呎左右煞停架車，我唔使變人肉三文治。當時我嚟唔切反應，全場工作人員望到直情呆咗。」事後Daniel則自責不小心，害得大家虛驚一場﹗

另一場他與古仔於崖邊埋身肉搏，最後「墮崖」的戲份，只靠古仔一隻手來支撐。戴上手套的Daniel表示感覺甚為「跣手」，幸而得拍檔身手敏捷，懂得借力才得以順利完成。

文﹕影視組