拉姑心酸泰國遙祝孫仔

身為栢芝好友的化妝師Rick Chin，日前才指栢芝會邀請爺爺謝賢和嫲嫲拉姑出席Lucas生日會，三代同堂慶祝。今日就是Lucas的4歲生日，但身為嫲嫲的拉姑卻遠在泰國，她接受本報電話訪問，心情沉痛地透露無人邀請她出席生日會，令她感到無奈又無助，惟有選擇去泰國為Lucas祈福。

記：記者　　　拉：狄波拉

「唔知仲有冇機會」

記：Lucas生日，係咪受到邀請出席派對？

拉（嘆氣）：唉！我真係唔知。

記：唔係邀請咗你咩？

拉（無奈）：呢個係出面講法，到目前為止，冇人邀請我出席。

記：咁你會唔會出席？

拉：我依家去咗泰國，啱啱落機，聽日係Lucas生日，我正正就係揀呢日，我嚟上炷香、還個神，為Lucas祈福，希望佢生活快樂，身體健康，開心成長，我依家只能做到呢樣，亦係我最大心願。（黯然地）我都唔知自己仲有冇機會同Lucas一齊過生日，所以特登嚟泰國上香，保佑我呢個孫仔，呢個就係我送畀佢最好嘅生日禮物。

記：唔好咁講，來日方長。

拉（神傷）：我真係唔知，或者過幾年，或者等佢長大，我年紀都大咯，唔知將來仲有冇機會。其實依家都好滿意，Lucas今年有爸媽同佢慶祝，好美滿，所以我咪嚟泰國，只能做到喺孫仔生日為佢祈福。

唔後生病痛梗有

記：之前你喺新加坡做身體檢查，報告出咗未？

拉：我唔係後生，病痛梗有，我睇緊醫生，好多謝大家關心。

至於爺爺謝賢被問到Lucas生日會一事，他昨於電話中表現有點勞氣的說：「一個細路嘅生日係我哋嘅家事。（準備咗咩禮物？）你想知乜嘢呀？冇嘞！」

採訪：音樂組、影視組、追蹤組