傅嘉莉教你消暑平靚正

夏日炎炎，有甚麼環保的消暑妙法？「翻版徐子淇」傅嘉莉教你以冰水敷面，不但完全免費，還可美容兼消暑，名副其實平靚正！

傅嘉莉：「我會早晚兩次用冰水敷面，啲毛巾放喺雪櫃，但唔使放喺冰格，每日早晚洗完臉就就做呢個動作，可以消暑，又可以保持皮膚靚靚，令啲皮膚收毛孔又有彈性。」

姚予晴：「我鍾意食西瓜消暑，由細到大都好鍾意食西瓜，最多時可以食三個，因為我唔鍾意飲水，覺啲水無味，所以覺得西瓜好解渴，又有質感，又多水，食完西瓜啲皮又可洗面，一舉兩得。」

Ana R.：「我會去潛水，但香港好難有靚地方潛水，所以一到夏天就會到東南亞，潛水睇海底世界，好開心，心情又可relex。」

鄭融：「我係好傳統嘅人，我鍾意用扇，我試過唔同質料唔同厚度嘅扇，無論係紙、布、膠都試過，我覺得最涼係一款好薄嘅布料，有啲似紗，好好用。」

Annie G：「如果唔可以開冷氣同電風扇，惟有用紙扇啦！又平又環保，或者搵人吹風都得，哈哈！」

Alice B.：「最環保嘅消暑方法就係從飲食同衣着着手，衣着方面，我會盡量穿薄身Ｔ恤，多飲水以及食雪糕都可以降溫。」

徐靖雯：「夏天當然係着背心短褲最涼快，可以將秋冬嘅舊衫改成夏天衫，例如將薄嘅長袖衫剪成背心，或者長牛仔褲改成熱褲。」

黃宗澤：「一定係我媽咪煲嘅羅漢果水，每逢夏天媽咪就會煲定一大瓶羅漢果水再放入雪櫃雪凍，每次我返屋企就會飲，飲完即時透心涼，好醒神。」

陳法拉：「我喺網上發現，有一個冰袋連背心嘅新發明，着住出街就好似孭咗部冷氣咁，個冰袋可以持續好多個鐘都保持冰凍，背心入面有好多個袋放冰袋，出外做嘢唔使埋位時就着住件背心。」