君如一大兩細失魂炒車

向來準時的影后吳君如昨日出席活動遲大到，原本下午3時30分開始活動，但她於4時15分才到埗，原來途中遇上交通意外，她到場後直言猶有餘悸。

女兒狂喊

君如表示其座駕於轉角位不慎撞到的士，發出「嘭」一聲巨響，同車還有其女兒陳是知及朋友的女兒，令她「嚇到人都癲」，幸好意外不算嚴重，最後沒有人受傷：「我已經揸得好慢，但自己大意，轉角位睇唔到架車，就撞咗埋去，我面都青埋，我個女就嚇到喊！同車仲有朋友個女，真係要打畀人講對唔住！（即刻打畀老公陳可辛？）有呀！個的士司機仲好好人，安慰番我，但因為要傾點賠償同處理啲嘢，所以都係遲咗。（賠幾多？）暫時未決定。」

君如表示每次女兒坐其座駕，都令她壓力大增，猶如變回新牌仔的感覺，而意外發生後，她仍未驚完，故決定暫時不再揸車。問到可會考慮聘請司機？她說：「有o架，但今日想親子樂一下，可能最近太頻撲四圍飛，精神唔夠，個腦有好多嘢諗緊。」

泰國度假

提到暑期已開始，君如表示待陳可辛完成一系列的首映後，便會舉家到泰國度假，趁機休息一下。此外，有線主播區永權帶同半歲的兒子到場探班，還將BB交給君如抱抱，令她笑逐顏開，但可能BB不適應閃光燈突然狂喊，十分搞笑！

採訪：影視組