Twins姊妹情深同日出嫁
Twins即將舉行十周年音樂會，最近為工作每天忙個不停，但二人仍對婚姻充滿憧憬。蔡卓妍（阿Sa）出道十年，06年於洛杉磯跟鄭中基秘密結婚，去年初宣布離婚，婚姻關係只維持短短四年，雖然年紀輕輕便經歷「婚」變「分」，但敢愛敢恨的阿Sa火速與師弟陳偉霆（William）譜出姊弟戀，更計劃將來跟好姊妹鍾欣桐（阿嬌）同日披上婚紗！而已屆卅歲的阿嬌，亦正期待着一生一世的圓滿婚姻！
阿Sa跟William拍拖只有一年，兩人經常表現恩愛，阿Sa每次提起William，總是展現出冧爆神情，可見男友在其心目中地位超然。
「我阿爸話識男仔最緊要脾氣好，脾氣好自然人品好，咁William都算係一個好男人嚟嘅，依家感情都幾好！雖然唔係成日見，但每日都keep住用電話聯絡，我覺得反而仲好，其實又唔一定要成日見，少啲見又少啲摩擦嘛，我唔係一個咁黐身嘅女朋友。」
拒用錢衡量感情
近日「鋒芝」婚變新聞日日新鮮，有傳栢芝為離婚一事而向霆鋒苛索金錢，令拉姑為之震怒。反之，剛離婚的阿Sa卻認為婚姻不是建基於金錢之上。
「一段感情、關係唔係用錢衡量，一分（財產）就會令局面好僵，最好分手方式就係和平為主，我做嘢都係，我唔會好直接講出我不滿，會以成件事嚟衡量。」
明年便三十歲，剛面對婚姻失敗的阿Sa，仍勇於去愛及勇於面對婚姻，對婚姻無限憧憬的她，一早便計劃好婚後的優游幸福生活。
「雖然依家興閃婚，但我唔會喇，啱啱先離婚，嗰頭又結婚咩！我同阿嬌都有傾過不如第時一齊結婚。我想喺三十歲頭結婚，差唔多啦，我嗰日同一個圈內女歌手傾偈，大家都覺得咁上下年紀係適婚年齡，可能你一路做嘢事業可以好好，但到頭來搵唔到自己家庭，一個人點樣昇華係一個個step咁上，所以呢個年紀就要開始自己家庭，依家做多幾年先！婚後我應該係照顧屋企為主，可能每年都搞歌迷聚會，一年只拍一部戲，做啲自己想做嘅嘢！」
搵Mani傾吐心事
離婚事件初期，家人擔心阿Sa不堪壓力紛紛出言安慰，但原來阿Sa比想像中堅強，並沒有哭哭鬧鬧，只需要空間冷靜下來。
「我拍戲做唔同角色都可以演繹得好，但現實生活中有好多角色都做唔好，最唔好係做女，做呢行要面對好多新聞，但屋企人唔係做呢行，知道出咗新聞我會唔開心，安慰我但又講唔到好安慰說話，例如離婚事件，屋企人會話唔好諗咁多啦、開心咪得囉，咁我知，嗰一下好難架嘛，我都有情緒，佢哋當時講嘅係啱，但唔會好切身我嘅感受，佢哋又覺得我哋係一家人要撐我，但我係一個唔係好需要安慰嘅人，畀我靜吓就可以回復。」
遇上心情不愉快，阿Sa會找經理人Mani傾吐心事，Mani則成為她的心靈雞湯。
「我唔開心會搵Mani傾心事，不過我通常唔開心都係關於工作，而工作係佢先幫到我解決，我對於生活好多嘢好easy，唔會好執着，唔開心係來自一啲技術性問題，所以搵佢最適合！」
心直口快係阿嬌弊病，就算選擇於網絡上發言亦被人誤解。
「其實我係一個抱打不平嘅人，雖然好少講嘢，但一開口就個個都啫住我，依家唔講嘢又啫住我，既然係咁，不如喺微博講啦，但微博講嘢又話冇語氣，啲歌迷就成日話我嬲、話我冇標點符號，或者之後我全篇嘢都用哈哈笑公仔，以前講嘢話我冇尾音，咁我以後加長我語氣啦。」
每個女人都期待一生一世的愛情，阿嬌亦唔例外，但愛他的男人一定要等她。
「如果真係搵到一個好男人，佢係愛我就會等我。我覺得我結咗婚唔會做嘢，要經營屋企，但未必會退出，睇吓老公鍾唔鍾意，或者得閒參與吓慈善活動、畫吓畫，又或者好似啲前輩咁做吓舞台劇咁，玩吓，幾有詩意，但我驚老公嫌我太悶。」
一個爛gag即回魂
即將舉行的Twins十周年音樂會，但Twins每天依然忙個不停，最安慰的，莫過於有人跟自己分擔喜怒哀樂，就算一個爛gag亦令自己樂上半天。
「最近重拾番之前「單飛」做嘢好辛苦嘅感覺，覺得難捱啲，依家兩個人一齊捱，好似有啲分擔咁，我哋呢個月底先拍完劇，但八月十七日十周年音樂會就到，真係好緊迫。我哋喺六、七、八月都好多嘢做，依家忙到爆，拍劇飛來飛去、內地表演同公開活動，啲時間好緊湊。有時真係好攰，但可能係對方一個爛gag又精神番，之前自己一個要面對好多嘢，兩個人一齊好容易咁就過咗啲時間。」
音樂會主題開心最緊要，計劃邀請Boy'z擔任嘉賓合唱《死性不改》，就連內地當紅女演員劉曉慶亦爭住要唱。
「我哋呢排真係冇停過，阿Sa可能着得多高踭鞋搞到膝頭痛，不過今次個騷都會跳舞，又會嘗試第二個排舞師，依家會應付八月嘅音樂會先，可能會請Boy'z做嘉賓，但未定有咩crossover，或者搵佢哋合唱最經典嘅《死性不改》，我喺內地拍劇，劉曉慶話好鍾意我哋首《死性不改》，但因為首歌係廣東話所以冇人同佢唱，咁我話有機會同佢去卡啦OK。」
William儲定「老婆本」
William於09年和當時的女友Angelababy分手，阿Sa又跟前夫離婚，各受情傷的他們因日久生情譜出「姊弟戀」。去年十月，阿Sa跟年輕自己三歲的William向本報大方承認拍拖三個月，當時William更公開冧到爆之愛的宣言：「唔怕肉麻講我哋係熱戀期，我好愛佢，認定佢係結婚對象！」對於阿Sa「放風」希望三十歲後結婚，相信William要加把勁努力儲「老婆本」。
口述：Twins 筆錄：倪小珊 攝影：劉智源 場地：FoFo by el willy 化妝：Natalio Soo.Ki 髮型：Sing Tam（阿Sa）、Daniel Cheng（阿嬌）