陳冠希怒喝記者：Get Out！

謝霆鋒與張栢芝爆出婚變，傳陳冠希與栢芝五月八日機艙事件成導火線，事實上「鋒芝希」三人十分有緣，大前日霆鋒到中環理髮，幾乎冤家路窄撞正Edison，事後Edison得知霆鋒在隔籬，即九秒九飛奔離場。

事隔三日，Edison到上海出席記者會，卻與同在上海出席Miu Miu時裝騷的栢芝幾乎撞正，最巧妙是連霆鋒的妹妹謝婷婷，昨日亦飛到上海出席另一個活動，謝張陳三家的緣分實在無法言喻。

保安抽衣領

前晚栢芝在Miu Miu花生騷玩得相當開心，風騷與場內人士合照和傾偈，又一邊開餐一邊睇騷和魔術表演，至晚上十時許離場。據悉栢芝前晚向新片《河東獅吼II》劇組請假，到上海出席品牌時裝騷，傳聞她之後留在上海為東方衛視《舞林大會》做準備，不過昨日經劇組證實，栢芝下午已啟程返寧波，今日埋位。

而Edison昨日上午十一時出席一活動，由於他與栢芝同時在同地，惹起不少臆測，記者即場問Edison與栢芝有否相約再見？曾侃侃而談機艙事件的他，聽聞「栢芝」二字即黑面發爛渣，怒喝該記者：「Get Out Of The Room！」並示意保安員將該名記者趕出門外，保安員左手拿着記者衣領，右手把記者推出門外，目睹整個過程的Edison竟偷笑，但全場記者卻鴉雀無聲，氣氛僵持，記招亦草草收場。

記者斥無禮

事後，被Edison派人驅趕的駱姓記者，接受訪問時忿忿不平地說：「用手推我出去，我話：『唔好推我，我自己識行！』但佢仍然推我出門外，我覺得做藝人可以唔回應，但佢冇理由趕我出去，佢對傳媒咁冇禮貌，好唔尊重！」

而栢芝今日為《河II》繼續趕工，該片投資者余毓興表示栢芝要到八月底才為新片埋尾，一切進度都在計算之內，完全不受栢芝多次請假影響，而劇組亦已接受栢芝稍後請一、兩天假返港湊仔。至於霆鋒昨日則在栢舍休息，無甚「動靜」。

文：專案組