陳慧琳心郁郁年底前佗B
陳慧琳（Kelly）於今年3月不幸流產，她曾揚言對再度懷孕留有陰影，不過經過四個月的休養生息，Kelly又心郁郁想再生；至於囝囝「蝦餃仔」日前兩歲生日，Kelly未有搞豪華生日會，只和他食蛋糕、送吻及擁抱，平淡溫馨！
身穿至潮裸色背心短裙、腳踏五吋高跟鞋的Kelly，昨日以全球代言人身份和另一代言人李治廷（Aarif）齊出席「月餅全球開售儀式」活動。Kelly受訪時，工作人員為她加衣，她否認體質差，只是現場冷氣太勁，目前已回復昔日的110磅體重，若發覺上鏡肥仍會再減。
蝦餃仔兩歲
自3月中流產痛失孖女後，Kelly一直以補品及看中西醫調理身體：「等醫生話我夠fit時會再努力（生BB）啦。（年底應OK？）再快啲，唔想再咁弱。（再快啲生？）心係咁諗，醫生話得就得，都仲驚，不過都試吓。」
本周日（10日）是愛兒蝦餃仔的兩歲生日，Kelly說與家人一同慶祝：「都係影吓相、唱吓歌、食吓蛋糕，收到三個蛋糕，佢食到一發不可收拾，佢影相時成日舔啲蛋糕，食好多。（有冇送禮物畀佢？）我同老公都係送吻同抱抱，佢已經成日收玩具。」
教仔女要嚴
對鋒芝離婚爆爭子撫養權，Kelly說：「佢兩個都係聰明人，相信佢哋會理智解決問題。」早前爆發猩紅熱，為安全計Kelly沒有帶囝囝上學，即使暑假亦怕人逼不會出埠旅行。對近日一名小學生用粗口罵父母的新聞，Kelly大叫驚驚，覺得更要嚴加管教子女，又慶幸身邊全是斯文人，不會亂爆粗口！
至於Aarif和年約三歲的小妹妹同台時，好動妹妹成功搶咪，令冇咪可用的他一臉尷尬，不過，Aarif自言鍾意小朋友。
文：音樂組