夏日豹兵

著名時裝設計師其實同普羅大眾一樣都是人，有唔同喜好，然而世上圖案之多，當中的Animal Prints是秋冬常客，但似乎一眾名師還未夠喉，在芸芸Animal Prints偏偏選中Leopard Print（豹紋）同步過春夏！

一眾女星就跟到貼，齊齊化身豹女郎，在大大小小活動上招搖過市。豹紋設計向來有種分外的野性時尚美，但能否着出那份「野」味？就要視乎功架有多厚，不想成為「豹」灰，星級形象指導亞南（Nam Kong）就點醒你！

李嘉欣雖然已為人母，但狀態甚勇，好靚好性感，完全眼前一亮，冇拆自己個「大美人」招牌。

GaGa向來係出位之人，無論言行或是穿衣態度都好另類，好鍾意Show Off自己，今次好貫徹誇張作風，成件事好理所當然。

周嘉玲本來着出一份型味，但奈何襯錯鞋，感覺格格不入，反而改穿黑色高跟鞋，簡簡單單更有女人味。

豹紋本身好Hard-to-Carry，但超儀只係簡單配襯高跟鞋，拉長身段比例，看似高挑，反而高貴得來又型得到。

鄭希怡的Total Look完全冇出事位，佢最高招係將秀髮向後Gel，好有中性味道，更有型。

着豹紋最穩陣係一件起兩件止，但莊思敏由頭豹到落腳，尤其是對平底鞋令佢造型更師奶。換對黑色Platform Shoes，Gel個Punk或誇張髮型，效果更佳。

官恩娜一身打扮就太過Casual，好師奶裝，突出唔到自己，不如玩盡啲改穿長身Colourful Tee同太陽眼鏡，搖身一變Hip Hop街頭Look仲型。

周杰倫唔可以話好、亦唔可以話差，因為台灣風格向來都係「唔知佢想點」，好似乜都想有啲，只可以話風格唔夠鮮明，好係佢Style，如果唔戴Cap帽更加順眼。

韓星阿Rain深明穿衣之道，明白甚麼係「Less is the best」，豹紋恤衫襯爛牛仔褲，好有Rock味之餘，亦有陣妖味。

時代不同，男人比女人在穿着更為大膽，敢於突破自己。今期之冠的豹紋早已深得不少男星喜愛，着上身散發出的姣味及妖氣，絕不比女性遜色！

Nam Kong，人稱亞南。

99年畢業於香港理工大學攝影設計系，現為張敬軒御用形象指導。07年獲邀擔任香港Lane Crawford的創作顧問，曾參與多位本地歌手唱片及形象造型顧問如林峯、鄭希怡、鍾嘉欣、泳兒與周柏豪等，更為HotCha寫真集操刀。10年替歌手方珈悠拍攝寫真，最近積極籌備模特兒經理人公司Model Max。