熊黛林搞笑忌醜怕趕客
杜汶澤訪問熊黛林（Lynn），笑爆阿Lynn要對住他的肥肉做戲時面紅怕醜的趣事，亦讚她有搞笑潛質。而阿Lynn談到緋聞男友郭富城，她直言不敢向這位影帝取經演戲，因擔心問題太低B，會貽笑大方！就算傾心事，她亦坦言不會找對方講，因女仔心事同女仔傾較好，難怪阿澤都笑阿Lynn，指城城只啱跟她去打邊爐！
杜：杜汶澤 熊：熊黛林
杜：現今影壇最搵到錢嘅就係笑片同動作片，我覺得你幾有潛質演笑片，你自己又點睇？
熊：我初初拍時都有啲驚，雖然平時都好搞笑、好放鬆，因為我唔鍾意時時刻刻都咁緊張，平時做嘢已經好嚴肅，如果唔做嘢都係咁，就冇人理我，但接咗《花田囍事2010》我又擔心，拍嘅時候如果太搞笑嘅話，會好醜樣，我驚啲客接受唔到！
杜反應很大：乜嘢客呀？
熊：時裝品牌嘅客戶，因為佢哋需要好高貴、好斯文嘅女仔做模特兒，如果我太搞笑，佢哋覺得我唔適合，咁點算？所以我最緊張自己會醜樣！
杜：冇客又係好慘嘅，咁你最後點樣平衡？
熊：公司同我講，叫我放開啲啦，你點會醜樣吖！
杜：我都有畀佢氹過，佢話我點肥都似梁朝偉！
熊：我當時真係信架！
杜大笑：你都幾天真、幾易氹喎！
熊：我之前睇番啲錄影，都有問自己點解可以放得咁開，比起其他人，一定睇得出我係第一次拍笑片，但我覺得自己已經放得好開。
杜：你第一部戲係《葉問》，導演係葉偉信，你覺得佢點呀？
熊：好搞笑，拍之前都知佢拍文藝片，好厲害。
杜：係呀，佢好勁架，佢有部《梁山伯與茱麗葉》，可以拍到吳君如咁靚，就知佢勁！
熊：君如靚吖！
杜哈哈大笑：你仲勁！同葉偉信合作時，佢有冇講粗口鬧你？
熊：冇，佢好斯文，好少講嘢！
杜：佢（指葉偉信）真係180度轉變，以前佢拍戲好瘋狂架！喺《葉問》裏面，你演師母角色，睇住老公同人比試，自己就出嚟陪個仔踩單車，好淡定，呢個真係要讚葉偉信，佢好識拍你，因為你係新人，未必講對白多會好睇，反而少對白，可以表現出民初婦女含蓄嘅一面。呢部戲你同甄子丹合作，覺得甄子丹點呀？
男人聚會唔多出聲
熊：我之前以為佢好惡，因為佢好打得，但原來唔係。
杜：佢真係好揪得，記得當年我同佢拍電視劇，廠出面會有架白車喺度等，嗰時有一句說話就係「返工搭廠車，放工搭白車！」嚟形容同甄子丹開工嘅情況架。
熊：咁犀利！我同佢合作拍電影，就覺得佢幾識講笑，係幾輕鬆嘅一個人，唔係咁嚴肅。
杜：拍呢部戲，你嘅對白唔多，只係行行企企，會唔會覺得太花瓶，冇乜貢獻咁？
熊：唔會，呢部係功夫片，當然係男人為主，咁大家睇睇吓，突然有一個好賢淑、好斯文嘅女人走出嚟，可以令觀眾睇完咁多動作戲咁緊張嘅時候，有一種緩和氣氛嘅作用，等大家唔好咁緊張，都有少少作用嘅！
杜：咁你平時生活，一大班朋友玩嘅時候，係咪都咁小鳥依人架？
熊：如果成圍枱都係男人，我會畀佢哋講，自己唔出聲。
杜：緩和氣氛？
熊：我鍾意聽人講嘢多啲。
唔敢向影帝男友取經
杜：你以前喺內地做模特兒，依家就喺香港做，你覺得兩個地方行騷有乜嘢分別？
熊：內地做完騷之後，會有咁快走咁快，因為一早就去到場地等，等時裝騷嘅導演安排，等個台搭好，之後綵排，夜晚行騷，工作咗成日，做完就想即刻返屋企，因為太攰喇。
杜：咁你幾時決定嚟香港長住發展？
熊：06年初，差唔多五年喇！
杜：香港點呀？
熊：我好鍾意shopping，香港簡直係天堂，有好多嘢可以買。
杜：初初嚟嘅時候，有冇遇到語言阻礙？我返內地工作，就成日畀人笑廣東話唔正！
熊：我初初都唔慣，但我知笑我嘅人係冇惡意嘅，都只係想幫我執番啱啲音，如果唔係佢哋幫我，我今日都學唔識廣東話。
杜：嚟香港住，有冇掛住屋企人呀？
熊：我屋企喺南京，我十一年前已經一個人去上海工作，到依家已經習慣咗，冇乜嘢，喺香港識聽識講，又有自己嘅朋友，過時過節冇時間返屋企，都可以去佢哋屋企過節。
杜：會搵咩人傾心事？
熊：搵經理人、同事傾！
杜：有冇搵郭富城？
熊：女仔心事，梗係搵番女仔傾好啲！
杜：咁你跳舞都可以請教吓佢，你拍戲有冇請教過佢架？
熊：反而冇，因為我唔好意思去問，人哋咁勁（金馬影帝），我問嗰啲問題，好BB班，所以冇問！
杜：雖然佢好勁，但佢都會教你，會同你分享吓嘅！
熊：我通常會去問導演。
杜：介唔介意同城城一齊做嘢？
熊：我唔介意。
杜：我同老婆就唔得，會鬧交架，因為太熟，唔熟反而會好好去溝通，但太熟就會直接鬧，你驚唔驚同城城合作，會同對方嗌交呀？
熊：我唔知，未試過。
杜笑笑：我睇你哋都唔會鬧交，只會打邊爐嘅時候，睇吓邊碟牛肉易熟啲。
遭阿澤色誘嗌救命
杜：記唔記得，我同你拍《最強囍事》時，我有一場除晒褲嘅戲，你驚唔驚呀？
熊：好、好、好驚！
杜：記得呢場戲係要我用男人嘅肥肉體嚟征服你，拍之前導演同你講，話一陣間阿澤會除晒衫褲色誘你，但你唔信，係咁笑話唔會嘛，隔咗一陣再講，你都仲係唔信，跟着，我入去黐膠紙，服裝姐姐一路黐一路偷笑，當拍嘅時候，一嗌action，我即刻除咗件浴袍，點知人大咗機器壞，部攝影機自己爆炸，因為有啲機器見到核突嘢係會自己爆，哈哈，呢段講笑，總之，我一除咗浴袍，光脫脫只係重要部位貼咗膠紙企喺你面前，你即刻大叫救命！
熊反應頗大：我真係好驚，蹲喺地下，心諗點拍呀，仲要望住你嗰度？點解會咁架？
杜：監製仲要你望住我重要嘅部分，仲叫你當嗰度係一個寶藏，有好多金銀珠寶，會發光架，睇見會好開心架！
熊：我當時亦只可以叫自己鎮定啲，因為若果NG嘅話，我咪要再睇多一次，咁唔得架，一定要做好啲，如果唔係仲大鑊，所以真係要當寶藏咁望，真係未試過！
杜：我之前曾經同高圓圓去美國行騷，我見啲模特兒喺後台換衫，因為太趕時間，都唔會理男定女就咁換衫。
熊：但唔會去望嘛，得嗰幾廿秒時間換成套衫。
杜：我見過有男模特兒叫女模特兒幫手攞底褲添。
熊：我冇遇過，亦唔會咁做，換衫時都唔會望人。
杜：咁你同我拍完嗰場戲，返到屋企有冇望番啲靚嘢補番數？
熊：冇呀。
杜：你講呢啲話題都面紅紅，你真係好可愛，好多謝你接受我今次訪問。
文：影視組
攝：劉智源
髮型：Eve @ P.O.P. hairdressing
化妝：Katherine Tsang
場地：金牌小龍