錢景峰拖女挑水着晒煙韌
名媛郭秀雲兒子錢景峰，自去年與新八模成員Mia分手後，不久已另結新歡。日前發現身穿「老西」的景峰，與一名長髮索女到銅鑼灣睇比堅尼泳衣，雖然當日有「電燈膽」同行，卻無損兩人行街興致，沿途見景峰除主動挽着索女手臂外，更不時輕摸對方纖腰，認真sweet！
現年20歲的錢景峰，早前跟已有兩名小朋友的新八模成員陳靜儀（Mia）拍拖，有指惹來母親郭秀雲不滿，戀情僅維持半年，最終分手收場。不過，景峰甩拖不夠半個月，已被母親爆在美國結識新歡。去年底，景峰又帶新女伴一起出席首映禮，可見其感情生活豐富。
當電燈膽冇到
日前下午5時許，記者在銅鑼灣百德新街發現身穿西裝的景峰，與一名長髮索女在附近行街。期間見景峰對該名披長髮、上圍豐滿、穿上貼身短裙的索女特別投契，全程傍到實，雖然有女友人同行，但無損兩人心情，依然有說有笑。沿途見景峰不時輕摸索女纖腰，而女方不但沒有縮開，相反顯得十分受落。當途經附近一間時裝店時，景峰隨即伸手挽着索女手臂，一同駐足在櫥窗前睇男裝。其後三人到附近商場睇泳衣，雖然店內大部分都是比堅尼，但景峰沒感尷尬，還全程在旁一起挑選，可見兩人關係非淺！
「佢成日換畫」
昨日記者就此事致電景峰的舊愛Mia，她表示對景峰拍拖全不知情：「唔知！不過我有聽朋友講過，佢成日都換畫o架啦！我之前喺party見到佢，我同佢打招呼，佢冇應我，好似唔識我咁！我都好愕然，亦覺得佢好無情。（祝福佢？）只要每個朋友開心，我都開心。（你有冇拍拖？）我依家單身，爸爸病咗喺醫院，我要照顧佢，所以冇時間拍拖。」 此外，記者致電郭秀雲及錢景峰，至截稿前兩人仍未有回覆。
文、攝：追蹤組