郭晉安嫌陳錦鴻嘈
陳錦鴻與郭晉安在新劇《團圓》中爭祖業爭到日日嗌交，錦鴻經常擘大喉嚨嗌交表現又燥又過火，被謔稱為「萬梓良第二」，昨日安仔、錦鴻、吳卓羲出席劇集宣傳，安仔直言覺得錦鴻「好嘈」：「佢不嬲都嘈o架啦！唔係依家至嘈，我同佢嘅恩怨喺《創世紀》開始，我避咗佢十年喇，有叫過佢唔好咁多嘢講唔好咁燥。（有冇聽？）聽佢就唔會搞到依家咁啦。（話刪剪佢嘅戲份？）可能係修改，其實個戲依家進入高潮，呢啲劇要慢慢煲。」
「嘈係我本性」
錦鴻則強調只是依劇本去做，獲導演的認同，再睇有否覺得演出有問題？他說：「我拍時好少睇番自己做戲，導演收貨就得。（話你係萬子第二？）真係唔知喎，我唔敢講！（安仔都話你嘈。）哈哈……可能係我本性啩，安仔都冇同我講過。」
歐倩怡就快生
安仔太太歐倩怡將於十日內產女，問他會否跟曹永廉爭結紮手術的廣告贊助？安仔說：「我唔生啫，唔使做呢啲手術，我爭避孕套廣告得嘞。」而近日猩紅熱肆虐，安仔說會注意三歲兒子的衞生。同場的陳曼娜跟吳卓羲合照時，笑說只有她合照不會惹緋聞，緋聞女友徐子珊因病缺席宣傳，是否被他與張馨予的戀情激病？他即說不會，二人是同事。
文：影視組