樂瞳顯孝心爭住畀錢

樂瞳早前憑電視劇《點解阿Sir係阿Sir》而人氣勁升，成為新一代「宅男女神」。上位後她身邊經常有仔埋身，但日前見她冇約男伴，反而抽空與父親及細佬飲茶兼行街市，做個孝順女。

深受學生歡迎

當日約下午一時，身穿熱褲及三吋高踭鞋的樂瞳，與爸爸和長髮戴黑框眼鏡的細佬在東涌一間酒樓飲茶，樂瞳除了不停夾點心給父親，食飽後更主動埋單爭畀錢。之後三人在商場內行逛，樂瞳主逛男裝店及電器舖，看來有意買禮物給父親，可惜未有收穫便離開。

由於當時正是放學時間，不少學生都認得樂瞳，更主動上前與她搭訕，亦有學生離遠用相機偷拍，可見她深受學生歡迎。最後三人再到附近街市買餸，樂瞳全程畀錢，父親一毫子都唔使出，十分孝順。

樂瞳歎完茶爭埋單，十分孝順。

雖然弟弟孭住結他行街，但樂瞳指他無意入娛圈。

細佬無意入行

事後樂瞳接受電話訪問，她表示平時會抽空享受家庭樂︰「開心日日都係父親節，平時得閒都會同阿爸飲茶，有時仲會去唱歌，佢好鍾意唱陳奕迅啲歌，好潮架！」她坦言收入不多，但仍會盡量畀錢家人，故希望接更多工作。問到手持大結他的細佬是否想加入娛圈？她說︰「唔係，佢初學結他，希望我將來有機會開mini concert，叫埋佢嚟jam歌。」

文︰專案組