栢芝發火狂轟霆鋒：咪再扮好男人
張栢芝與謝霆鋒驚爆婚變，震撼中港台演藝界，縱使兩位當事人對婚變未有回應半句，但謠言卻滿天飛，栢芝被攻擊得體無完膚：貪錢、霸道、無理取鬧、以子要脅老公……對於種種傳聞，栢芝為了兩個寶貝仔一忍再忍，但對於丈夫霆鋒，栢芝卻忍無可忍，沉默24天後，終於要站出來，揚言要親自揭開丈夫的「真面目」，她直指霆鋒不斷在幕後「放料」，營造栢芝負面形象，才會令事情有如此的發展。栢芝接受訪問時更力斥謝霆鋒不要再扮「好男人、好老公、好爸爸」！相信「鋒芝婚變」幾成定局，沒有再挽救的餘地，這對曾是觀眾眼中的金童玉女，童話式婚姻已快成歷史。
張栢芝前晚在胞弟張豪龍、經理人陪同下漏夜離港到德國工作，昨日接受本報長途電話訪問，栢芝揚言要打破沉默，親自為近日種種不實傳聞解畫，對於她與霆鋒是否會離婚，栢芝認為是後話，今次她挺身而出接受本報獨家訪問，只為將事實公諸於世。
「鋒芝變」源於5月30日，身為狄波拉好友的查小欣，在電台節目中爆料，狂數栢芝「有計謀地陰乾霆鋒5億身家」，不斷家嘈屋閉，鑑於拉姑與栢芝婆媳關係一直被指有問題，令大家「順理成章」地推斷拉姑是查小欣背後放料人，為了兒子不惜將媳婦推落谷底，但栢芝卻推翻此說，認定丈夫霆鋒才是真正放料人。
記：記者 栢芝：張栢芝
記：點解你認為霆鋒係放料人？
栢芝冷靜地說：我嫁咗佢5年，由18歲識佢到依家31歲，我點會唔知佢係咩人？！佢一直喺度扮有型，大家睇佢成日戴住黑超就知，我曾經問佢，點解成日都戴住黑超？佢話戴咗之後，自己講真話同假話都冇人知，所以，佢攞影帝應該真係要鼓掌架！
記：除咗因為你同佢認識咗13年，結咗婚5年，好了解佢之外，仲有冇啲實質嘅理由，令你一口咬定謝霆鋒放料？
栢芝由原先的冷靜，開始帶點激動地說：好多嘢只係我兩公婆先知，係兩公婆嘅對話嚟，根本無第三者知道，霆鋒同拉姑嘅關係一向唔好，謝霆鋒攞影帝嗰陣無多謝佢（指拉姑），第二日拉姑同查小欣申訴，之後，拉姑就一直冇同我哋聯絡，亦冇嚟過我哋屋企坐過，好似我搬咗去陽明山莊、交幾多個月租，拉姑根本完全唔知，咁點解查小欣會講到出嚟？邊個放料好明顯，呢啲借刀殺人嘅方法，令到兩個女人（拉姑與栢芝）畀人圍攻都完全唔理，呢種做法，我覺得好不齒，有乜嘢咪行出嚟講，點解要咁鬼祟？
「個幾月搵唔到佢」
記：查小欣講嘢到依家差唔多一個月，期間有咁多負面消息，點解你一直唔去解釋？
栢芝語帶無奈地說：我一直啞忍嘅原因，係因為為咗頭家，我好唔想兩個仔喺破碎家庭、單親家庭度成長，但佢冇心領，到咗尋晚喺我上機之前，佢仲喺度放緊料，我真係忍無可忍喇！覺得要企出嚟講嘢！
記：有冇同謝霆鋒聯絡過？
栢芝斬釘截鐵地說：我呢個幾月嚟都搵唔到佢，上機之前，我用冇來電顯示電話打過畀表哥（霆鋒助手），我同佢講，你老細再咁樣放料法，我唔可以再忍喇！好多嘢都只係我兩公婆先知，佢依家咁做，我只好將佢嘅真面目揭開，話畀人哋聽謝霆鋒究竟係個乜嘢嘅人，唔好再喺度扮好男人、好爸爸！
「佢好少理兩個仔」
記：咁喺你心目中霆鋒係個點樣嘅爸爸？
栢芝：佢好少理兩個仔，喺屋企都當兩個仔透明咁，冇理佢哋，佢只係想叫我生仔嚟困住我，佢根本唔鍾意小朋友！
記：你同表哥講唔可以再忍，要揭開霆鋒嘅真面目，霆鋒有乜嘢反應？
栢芝再次激動地說：佢喺電話旁邊講「你咪講×我，我鋪排咗咁耐，整到你形象咁差，睇吓啲人信邊個囉！」
記：係咪就係呢句說話，令到你今次忍無可忍？
栢芝憤怒地說：係！就係因為呢句說話，我決定唔再啞忍，要企出嚟講嘢！
「佢唔想我分家產」
記：霆鋒點解要攻擊你？
栢芝：因為佢唔想我分佢家產，所以整到我形象好似好貪錢咁，但同事實根本係兩回事，我唔需要靠佢！錢對我嚟講，多有多使，少有少使，我依家又唔係冇錢，就算唔做娛樂圈，我都冇問題！
記：事情已經去到呢個地步，係咪決定咗離婚？
栢芝無奈地表示：我啞忍咗咁耐，就係為咗頭家、為咗兩個仔，所以，離唔離婚呢啲係後話，依家呢一刻，我只係想揭開謝霆鋒嘅真面目。