甄子丹睇騷遭同志博懵
有「宇宙最強」之稱的甄子丹，憑着打得加上fit爆身形，不止獲功夫迷垂青，日前他在意大利米蘭參加派對時，亦被當地的同性戀者意圖「姣擒」，就連時裝設計師Domenico Dolce亦問他索內褲照！
甄子丹與太太汪詩詩連日來在米蘭拍拖兼睇時裝騷，前晚半夜他們在米蘭出席時裝品牌Dolce & Gabbana舉行的派對，甄子丹在場內被兩名高大靚仔男模搭訕，不過問長問短一輪，兩名靚仔開始對子丹毛手毛腳，但子丹全程都不覺對方對自己打主意，更禮貌地與兩男寒暄，當時汪詩詩與品牌高層已發現兩男另有企圖，只是子丹仍然蒙在鼓裏。
設計師索內褲相
現場職員最終拉走兩位靚仔，並告知子丹：「他們是同性戀者！」子丹坦言不覺兩人另有企圖，並說：「佢哋只係熱情咗少少！我向來都唔抗拒同同性戀者做朋友，亦好歡迎同志fans，佢哋市場咁大，有多啲人欣賞我，當然係好事。」
此外，當晚品牌設計師之一Domenico Dolce亦款待子丹與詩詩，Dolce聞子丹曾拍內褲廣告時，亦即時問子丹拿相欣賞，子丹說：「我同佢講手機入面冇，下次先畀佢睇！」
余文樂參觀酒莊
余文樂亦獲品牌邀請到米蘭出席時裝周活動，余文樂除了出席Salvatore Ferragamo男裝系列酒會外，更獲品牌家族成員邀請出席私人晚宴。此外，他又再到品牌的羅倫斯總部及郊外的酒莊參觀。而金城武亦以代言人身形，出席他擔任代言品牌的時裝騷。
文：名人組