阿Lam全家騷溫馨滿瀉
一連三場林子祥（阿Lam）演唱會在父親節圓滿結束，阿Lam的一對仔女上台獻花，他還公開多謝媽咪賜予濃髮和「好氣」，完騷後阿Lam跟老婆葉蒨文（沙麗）雙雙出席慶功宴，溫馨滿瀉！
入行35年的阿Lam，前晚父親節舉行尾場騷，吸引朱玲玲和老公羅康瑞、莫文蔚（Karen）一家四口、朱璇、黃耀明、蘇永康及久未露面的影星黃韻詩睇騷，阿Lam亦舉家支持，老婆沙麗在控制台負責音響，女兒April跟老外男友拍拖出現，還有兒子林德正和90歲媽咪，濟濟一堂。
憶亡父哽咽
阿Lam甫出場即祝福所有爹哋父親節快樂，他的一對子女上台獻花，三父女深情相擁，阿Lam亦在台上多謝媽咪：「我咁好氣都係由佢嚟，好多謝你生我出嚟，最多謝畀我咁多頭髮。」林媽媽開心到跳舞，而阿Lam唱《追憶》＋《單車》＋《空櫈》medley送給亡父時感觸哽咽。
封Karen英雄
此外，阿Lam前晚請了心目中的英雄睇騷，除了羅蘭、余慕蓮、潘源良、鄭國江外，他還封10月新娘Karen做英雄：「你就嚟結婚，仲唔係英雄。」Karen開心到跳起，蘇永康、黃耀明都拍手恭賀。完騷後，阿Lam和沙麗雙雙出席慶功宴，問沙麗點解唔上台？阿Lam說：「呢個騷唔係for嘉賓，佢幫我睇啲聲，所以音響一晚比一晚好。（點多謝佢？）唔使多謝，佢做騷我一樣幫佢。」問只開3場會否太少？他坦言：「要精先得，多冇用，20幾場我個人都做唔到。」
採訪：音樂組