發哥擔心成目標 唔敢打赤肋
無綫旗下藝人近日接二連三成偷拍對象，震撼全城，身為影壇大哥的周潤發昨晚出席新片首映時，也忍不住直斥偷拍行為過火，並以恐怖來形容，認為拍攝可以接受，但不應公諸於世，自言也擔心成為下個目標！
英皇電影《建黨偉業》昨晚於灣仔會展舉行首映，周潤發夫婦、張家輝、劉燁、楊穎（Angelababy）、葉璇、胡杏兒等盛裝出席，首映入口處設下長長的布景板，講述《建》片於1911年至1921年的歷史，以演員劇照來貫穿，製作精美，旁邊還有杜莎夫人蠟像館借出的毛澤東及周恩來蠟像供觀眾拍照留念。
明星變fans
眾多演員中以發哥最受歡迎，他與太太挽手恩愛入場，於簽名區碰上老闆楊受成及其太太陸小曼，四人握手寒暄，期間發哥吸引不少觀眾要求合照，胡杏兒也趁機攝位影相，就連鍾舒漫也趁發哥接受傳媒訪問時在旁偷(目及)，場面惹笑。
已剃掉鬍鬚的發哥被大讚後生不少，逗得他開心不已，對於劉燁指有他在首映助陣，壓力大減，發哥笑謂：「佢先至係主角，我係襯嘅啫。（劉燁話想同你交換角色演。）唔得，我演唔嚟，都唔似。（點睇自己角色？）未睇，今晚先第一次睇，其實今次好開心，部戲又多好演員，每日開工好開心，我都萬歲咗兩次。（劉燁話同你冇對手戲好可惜。）之前合作過，仲做過我個仔，要合作大把機會。」
家輝搏命擦
談到近期偷拍事件成全城熱話，發哥直言行為過火，他亦擔心成偷拍對象：「可以影但唔好出囉。（擔心？）都擔心，影到就好恐怖，核核突突咁，我喺屋企都一路有着衫。（廁所唔會着！）廁所位好隱蔽，有磨沙玻璃，唔會唔着衫出露台。」
對鋒芝婚變傳聞，發哥剛從內地回來暫未知事態發展，故還平淡的說：「冇嘢啦。（有傳栢芝帶仔返加拿大？）咁嚴重，去加拿大升學咋！？（話栢芝想收埋Lucas？）唔會，佢係未來之星，做咩收埋佢。」
至於最近為新片激減逾十磅的張家輝，體形明顯消瘦，他大呻搵衫難。談到日前與老闆楊受成擦海鮮，家輝坦言當日「搏老命」：「之前過地獄式生活，加上海鮮唔肥，所以嗰日搏命食！」又自爆有內地片商斟他再演歷史人物，家輝因不了解背景而婉拒。
文：影視組