朱玲玲撐師妹搬乖仔上枱
今屆入圍港姐未選已是非不絕，C許亦妮被爆男友多多，有最美麗港姐之稱的朱玲玲昨晚出席活動時開腔力撐師妹，不惜將兒子擺上枱說：「拍拖好正常，我個仔都拍拖。」並大方指會捧兒子霍啟山舊愛章子怡的新戲場。
朱玲玲偕好友葉蒨文昨晚出席慧妍雅集慈善晚會2011，同場還有趙雅芝、葉翠翠、陳法蓉等，衣香鬢影。朱玲玲說喪母不久，大部分時間用來陪父親，父親節將至，她會陪爸爸食飯慶祝：「仔仔下午會陪公公食飯，夜晚就同番爸爸食飯。（會送咩禮物？）爸爸叫我唔好買，有需要平時都會送，唔會等節日先送。」
不避嫌捧子怡場
提到今年港姐被爆私生活不太檢點，朱玲玲維護師妹，指她們得十七、八歲年紀細，要邊學邊吸收經驗：「我當年都學到好多嘢，到依家入咗慧妍29年，一直都學緊嘢。（今屆多負面報道。）因為依家多咗傳媒，競爭又多，你哋又要交稿，咪關注多咗。其實拍拖好正常，我個仔都拍拖。（有候選港姐退選，選美壓力好大？）做乜都有壓力，唔只選美，不過適當壓力係好事。」其子霍啟山的前女友章子怡有新戲在港上映，朱玲玲不避嫌說：「我可以去捧場，不過我好少時間去睇戲。」
對於「鋒芝」傳婚變，朱玲玲笑言應該問她的丈夫：「佢年紀大過我，經驗會好啲，佢聰明過我，我做番自己，做人要reasonable（明理），我唔難相處，老公都唔難相處。（大家財政獨立？）老公係潮州人，好大男人，你問番佢。」
葉翠翠曾經此苦
葉翠翠同樣以過來人身份勸勉師妹，指未參選前她們都是普通女仔，未試過這樣被人批評，相信有壓力：「我當年都有情緒低落，總之唔好睇咁多雜誌。（你當年多負面新聞。）我有同港姐保母訴苦，佢有安慰我，話記者想賣書，唔係針對你。」而身為城中夫妻典範的趙雅芝對鋒芝傳婚變感可惜，坦言夫妻間難免有摩擦，最重要互相遷就。
文：名人組