父親節選完美Daddy 容祖兒：四哥chok爸之最

父親節將至，人人都想有個完美爸爸，最好「型英帥chok」四大特質俱備，不少名人明星都推舉本地薑謝賢（四哥）及任達華是名副其實的chok爸爸！祖兒更說謝賢比兒子謝霆鋒更chok，無人能夠取代。

容祖兒：四哥一出，誰與爭鋒！四哥謝賢係原汁原味，冇人能夠代替嘅chok爸爸，雖然謝霆鋒都chok，但係四哥勁啲！

陳偉霆：當然係四哥謝賢啦！永遠都係咁有型有款，感覺佢好照顧人，打扮又一絲不苟，將來我都想做個chok爸爸！

邱李茂琪：我會揀謝賢，佢永遠都係咁chok有型，係非一般Daddy！

姚予晴：我覺得尊尼特普最型，佢畀人感覺好頹廢、不羈、好壞孩子，唔係一般好爸爸嘅類型。最chok爸爸一定係謝霆鋒，因為佢任何時候個樣都好chok，chok已經變成佢最自然嘅一部分。（男友Sunny將來會唔會成為最型爸爸？）佢都係嘅，如果真係有仔女，佢會係一個廿四孝嘅爸爸。

陳豪：我會揀碧咸，因為佢真係超級靚仔，好完美，可惜佢把聲高音咗啲、雞仔聲啲，不過佢唔出聲真係殺死人！

Amanda S. ：一定係我爸爸！我爸爸係nice guy、又靚仔又charm，真係好完美！我唔需要我老公都係同爸爸同一類型，因為自細同爸爸成長相處，已經完全感受到佢嘅好同完美，我反而希望老公係另一個類型嘅男人。

林莉：梗係揀任達華，佢份人好好，而且又有男人味又fit，外表好似好cool，但其實佢冇架子，畀人好warm感覺。

區文詩：畢彼特啦！佢不但靚仔，仲係好丈夫，成日見佢同啲細路一齊。

佘詩曼：畢彼特同任達華，大家又型又靚，係好老公好爸爸，尤其任達華keep得好好，健康又靚仔，又識做戲！