陳潔靈情傾鬍鬚男拒吼阿Lam
行年63的林子祥（阿Lam）跟55歲的陳潔靈（Elisa）相識超過三十載，兩人互相欣賞，親密關係more than朋友，但緋聞不絕的阿Lam卻從沒和Elisa傳過曖昧關係，原來阿Lam遭眼中獨愛「鬍鬚男」的風騷Elisa「拒愛」，「衰」在他有太多女埋身，愛上阿Lam等同自掘墳墓。
林：林子祥 陳：陳潔靈
林：其實我哋都算係同期出道，我大約喺75年出道做歌手。
陳：我比你早少少，都係早你兩、三年，可以話係你前輩。
林：終於搵到人係我前輩。
陳：我喺72年入行，嗰時係一邊玩Band，一邊讀書，依家再講番，真係好遙遠嘅事。
林：其實我唔記得大家點識囉，應該係EMI（唱片公司）年代，喺錄音室囉。
陳：我都唔記得咗喇，都應該係，當時我係新特樂樂隊嘅成員。
林：係呀，我喺錄音室錄緊唱片。
陳：我哋唔係喺街邊識架咩，哈哈？
遺憾冇合唱歌
林：係阿一（香港粵語流行曲唱片監製鍾定一）講畀我聽。
陳：咁即係唔係你記得啦，阿一係監製（唱片），之前亦係我經理人同唱片監製，亦係我入行第一位老師。我哋唔止喺EMI做過同事，喺華納（唱片公司）時都喺一齊啦。
陳：但係我哋未試過出合唱唱片架，因為你夾開杜麗莎，我係依麗莎嘛，莎就莎喇，不過此莎不同彼莎。
林：你有自己一班人玩，有自己一隊Band，嗰時唔興跳嚟跳去（指唱片公司），都係做自己嘢，嗰時我隊嘢叫玉石樂隊。
陳：我同你冇真正嘅合唱作品，都有少少遺憾架，但喺TVB節目同演唱會都有合唱過，不過多數係英文歌囉，我記得，做過你加拿大演唱會Tour嘅嘉賓，本來仲應承咗你做埋美國嗰站，但係我唔見咗Passport呀！點解我咁深印象呢？係因為嗰次大風大雪，仲要我唱我唔識唱嘅歌，我一定要學，歌名叫《選擇》，係國語歌，唱到我鍊晒頸，好高Key。
唔啱key無謂暗戀
林：我哋差啲就做咗親家（戚）架，你同過我細佬拍過拖。
陳：我記得，不過冇擺喺心裏面之嘛，都幾十年嘞。
林：我都唔係好記得囉，係咪我介紹架？又好似唔係我介紹架喎？咁你哋點識呀？
陳：去日本睇Rod Stewart Concert嗰次囉，不如咁講啦，我哋嘅緣分係喺我讀中學時，有位好好嘅同學，係你屋企人，佢講畀我聽，佢有兩個哥哥，其中一個就係林子祥。我識林子祥咁耐，你都冇講畀我聽有個細佬（林子輝）。
林：你哋開始時，其實我係唔知架。
陳：嗰時我哋發展得好自然，好低調，唔刻意架。
林：你係咪一直都鍾意有鬚嘅男人架？你識個個都有鬚喎？
陳：唔係，只有一個，咪就係你細佬囉。雖然你好好，但我從來都冇暗戀過你，因為都唔啱Key嘅，你都唔講嘢。
林：我細佬咪仲講得少嘢。
陳：你當年已經畀人重重包圍，我做咩喺啲冇結果嘅事度兜圈啫，不如自己轉條生路出嚟，我冇暗戀過你，不過好欣賞你架。
林：咩轉條路呀？塞車呀？
陳：咁我咪自己搵第二條生路，我聰唔聰明先？唔係就死路一條，單戀你三十幾年做乜啫？都無謂。其實你個人唔係好悶，你好有趣架。當初識你時，我對你冇乜印象，因為都搵唔到你嘅，你喺啲（酒）吧唱歌，鍾意將啲燈校到好暗，你個人又好黑，連啲樂手全部都係菲律賓人，個個黑mun mun，所以睇你唔到。
讚真的漢子 夠幽默
林：不過我第一次做紅館演唱會，就係你同葉德嫻（Deanie）做我嘉賓，嗰次真係好好玩。
陳：我記得，我仲記得嗰次我着咩色裙添，係條綠色短裙。
林：你兩個嗰次博晒我懵啦。
陳：係你博我哋懵咋，總之我哋博你懵，你又博晒我哋懵啦，因為嗰日我生日，所以你咀我個嘴。
林：一個Elisa，一個Deanie，兩個女人都咁風騷。
陳：我哋成日整蠱你、玩你，初初以為你唔出聲，恰得過，原來你好蠱惑架，其他人都知唔知，原來你係真的漢子，唔係惡嗰啲，不過大家都知係玩。
林：哈哈……
陳：我知你唔會真嬲我，大家都知係玩，你係君子，我係淑女嘛。
林：我覺得做人一定要有啲幽默感，個個都可以玩得，其實大家真係唔認識我，不過唔關大家事，只係我避得好好。
陳：我知，我唔同。
林：你會知，因為你有睇我啲Show。
陳：不過做Show同真人個樣都好唔同，我係你朋友，又係你觀眾就會知，其他人未到嗰個位，我會知你深層嘅幽默感。
林：有幾深層呀？
陳：好幽默囉，平時睇你嘅唱片同演唱會就知啦，你出啲碟咁有幽默感，有隻碟就黐撇鬚，有次就扮女人，一眼就睇得出係你諗出嚟，你用咗好多心思，會睇到會心微笑。
自認懶人冇壓力
林：因為我唔鍾意認叻，叻由得人哋去認，認叻唔係我嘅sytle。
陳：好似你上次幫英皇出嗰隻碟，都好有深層意思。
林：《佐治地球轉》（2007）嗰隻。
陳：你啲碟一定係用自己嘅諗法架。
林：我覺得做碟係要自己諗嘅，畀晒人諗唔得嘅，依家啲人就少啲用呢種做法，因為我出碟都出得好密，一年都有兩至三隻。
陳：我出碟就出得冇咁密，因為我係懶人，我只會喺錄音時，某情況上有壓力，其他嘢都冇壓力。
林：我唔覺得要創作隻碟會有壓力，我咁多年都係咁，其實到依家我啲idea都好澎湃，有時，我瞓緊覺，我都要練習唔好有咁多idea湧出嚟。
採訪：音樂組
攝影：黎志輝
場地：都會海逸酒店總統套房
化妝：lvan Lee