鍾嘉欣哭崩升呢誓爭視后

嘉欣向來被指演技麻麻，一直未能站穩一線花旦之位，不過，她在《點》劇中飾演的Miss Koo演技突然升呢，在前晚播出的一集，嘉欣終識破羅Sir（陳豪）原來是臥底，梨花帶雨嚎哭，還把手袋「車」落「賤男」陳豪身上，令不少網友為之動容，大讚她演技出色，並力撐她挑戰佘詩曼爭奪視后寶座。

前晚討論區、facebook及無綫官方網頁，網友紛紛以「洗版式」留言為嘉欣壯聲勢，無綫官網更錄得《點》劇有110萬點擊人次，有網友表示看到Miss Koo崩潰一哭，連男性亦為她落淚。而被公認為筍盤的陳豪因角色欺騙別人感情，被網友封為世紀賤男，更有人揚言要追殺賤男陳豪，認真無辜。

嘉欣昨日在電話中說有留意網上留言，未想過會有絕佳反應，談及拍這場喊戲不是很辛苦，因為夠時間做功課投入角色，又有陳豪帶她入戲，兩take已搞掂！嘉欣又說從未想過奪視后：「真係冇諗過，反而好想攞我最喜愛女角色，呢個角色成功，真係可以加強我嘅信心！」由於她要去馬來西亞工作，故難於約同劇演員一起睇大結局。嘉欣認為大家覺得陳豪是賤男，證明他演出成功。

陳豪話大吉利是

陳豪對被封「賤男」及被網友「追殺」，他說：「啋！大吉利是咩，做戲之嘛！起初我都有同監製商量過角色，佢話會畀到個位我證明欺騙感情迫不得已，先至接呢個角色，我都唔擔心嘅。」而劇中飾演嘉欣家姐的朱慧敏，前晚亦被嘉欣感動至哭，她留言：「我哭了，痛心！」

飾演學生的樂瞳亦大讚嘉欣演得出色，力撐對方封視后：「覺得佢好突破，開頭好cool、拍拖又好sweet，尋晚（前晚）佢歇斯底里嗰場，我成家人都好投入咁睇，我仲睇到喊！」此外，無綫和廣管局分別接獲兩宗投訴，主要是指《點》劇帶出欺騙感情的意識，不宜在這時段播出。

文：專案組