鄭嘉穎操肌有功擒羊失威

鄭嘉穎、李詩韻和胡定欣前晚為無綫新劇《拳王》拍外景，場口講述李詩韻下嫁他人前，來到嘉穎寓所樓下見面互訴真情。劇中飾演拳王的嘉穎為角色已操得變「肌男」，六塊「朱古力」亦漸見成績，他說：「依家飲食都好節制，餐餐都係食雞胸肉。」操肌無難度，但前晚他卻被「綿羊仔」考起！

媽咪反對

話說劇情講到嘉穎駕駛「綿羊仔」跟隨李詩韻到轉往另一地方傾偈，但拍攝時由於嘉穎沒有電單車車牌，只能在「綿羊仔」上擺甫士扮開車，到正式開車時換上替身頂替，嘉穎如此失威原來為阿媽，他表示：「自己一路都好想學電單車，一來方便，二來感覺又好自由，但係因為媽咪一直反對，話揸電單車太危險，其實依家都仲好想揸電單車o架！」

戴上頭盔的嘉穎被李詩韻嘲笑似卡通小吉。

嘉穎、李詩韻與幕後工作人員合照。

微博傳情

至於李詩韻在劇中也有打戲，只不過是捱打的「打」，劇情講述她為討好意中人鄭嘉穎，而跟他學泰拳，又甘心充當沙包，她笑說：「場戲喺廠景拍咗，其實唔係咩打戲，我唔使好似佢哋練得咁辛苦，只係攞住軟墊畀佢練拳。」

李詩韻（左）、胡定欣前日齊齊拍外景。

李詩韻在劇中為冧嘉穎而當沙包捱打。

有傳李詩韻與鄭嘉穎戲假情真，因拍劇而撻着，而現場所見兩人亦未有避忌，不時有講有笑。李詩韻更在微博上載一張嘉穎戴頭盔的照片，還取笑他像卡通人物小吉。

文：影視組

攝：黃叔榮