Soler遇惡客怒睥險被爆樽
孖仔組合Soler經常在酒吧出騷，雖然他們每次都嚴陣以待，以防觀眾醉酒鬧事，可惜有次在內地酒吧騷中遇到一個惡客，期間更被怒目而視，作勢爆樽，嚇得二人「標晒冷汗」！
Soler將於明日假中環舉行音樂會，與新進地下樂隊交流。問到Soler多年酒吧演出的難忘經驗，他們說：「有次去內地出騷，有個客可能飲大咗，全場怒睥我哋，仲拎住個樽好似想爆我哋咁，我哋嗰陣好驚，好彩佢啲friend捉住咗佢！」不過他們自爆也有一些搞笑「艷遇」：「成日有啲男fans飲醉衝上台，又攬又錫，笑到我哋『碌地』！」雖然酒吧騷「多多麻煩」，但是他們表示不會介意，皆因氣氛好咁話！
學做殺手
提到出騷以外的工作，他們說：「啱啱去台灣拍完《痞子英雄》電影，我哋做殺手，學咗好多打人、護身方法，好好玩！」他們亦透露有份參與劉鎮偉導演的賀年笑片，二人亦賣口乖大讚對方：「佢係喜劇天才，搞笑timing好準，又識發掘演員嘅長處，所以我哋做得好自然。（有邊個對手？）有陳奕迅、蘇永康等等，都好多歌手參與。」
事業行先
提到私生活方面，大孖Julio透露與女友感情穩定：「同佢關係好好，不過未有結婚計劃，（佢有冇催婚？）咁又冇。」而已婚的細孖Dino則表示未有計劃生B，現階段都是工作為上，先做好中、港、台等地的工作比較重要，他們自爆今年會與台灣樂壇大哥羅大佑合作巡迴內地騷，十分興奮。
文：音樂組