曹永廉一家四口齊心搵銀
曹永廉的太太姜依蘭（Elaine）最近與友人合資開童裝店，阿廉身體力行撐六月臨盆的太太，經常抽空落舖執頭執尾；而囝囝Brandon亦chok住擺pose幫手代言，一家三口連未出世的BB齊齊搵銀！
曹永廉形象健康，一家三口經常被廣告商睇中拍廣告，最近阿廉老婆Elaine與友人合資七位數字在中環開童裝店，三歲大的兒子正好做免費宣傳大使，每日換上新衫去街街，拍照時更照足爸爸指示，叉腰翹腳擺pose，十分可愛。阿廉笑說：「我哋好鍾意幫阿仔影相，佢都識chok住望鏡頭，似足我咁型！」
囡囡下月出世
Elaine意外再度懷孕，預計BB女六月出世，她表示不擔心因而影響生意發展，Elaine說：「自從生咗Brandon，好想搞一啲同小朋友有關嘅嘢，早前有朋友話有興趣開童裝店，咁啱大家都有上網幫襯一間美國品牌嘅童裝衫，於是膽粗粗send email去傾，真係畀我哋傾成個大中華區獨家代理權，雖然依家有咗BB，但身邊好多人幫手，老公唔使開工都會落舖執貨，我只做文職工作。」阿廉則因老婆經常捱夜而大呼心痛：「佢有次開到夜晚十二點先收工，真係怕佢太辛苦，忍唔住都要話兩句。」
Elaine雖然被鬧，但卻甜在心頭：「阿仔都好錫我，每晚都會錫我肚皮一啖，話將來會照顧妹妹。」
拒做怪獸家長
阿廉直言教小朋友好困難，不想做「怪獸家長」，他說：「小朋友唔可以太縱，適當體罰係需要嘅，有時Brandon太曳曳會打手板。將來妹妹出世，我同安仔（郭晉安）都覺得要放多啲時間喺大仔身上，唔可以令佢有被忽略嘅感覺。」
採訪：專案組
攝影：劉智源
場地：appaman@central